«Սպանդանոցից միս են բերել, շան դեմը գցես, չի ուտի»․ գյուղացիները դադարեցրեցին ակցիան եւ որոշեցին սպասել

 

Մեր պահանջը ոչ վարչապետի դեմ է, ոչ իշխանությունների դեմ է, մենք ուզում ենք իմանալ՝ ինչպես են աշխատելու սպանդանոցները։ Այս մասին այսօր՝ հունվարի 21-ին ասացին Երեւան-Սեւան ճանապարհին «Արծվի թեւերի» մոտ բողոքի ակցիա իրականացնող անասնաբուծությամբ զբաղվող գյուղացիները։

 

«Ոչ մեկ չի պատասխանում, ՍԱՏՄ ղեկավարը ամպագոռգոռ խոսում է, ասում է՝ ձի ծախող, էշ ծախող, չի կարելի։ Մարդիկ զայրացած են իր բառերից։ Մենք ընդամենը հարց ենք տվել, թե ինչպես ենք 350 կգ ցուլը տեղափոխելու։ Հարցեր են, որ լուծված չեն։ Չգիտեմ՝ ոնց է լինելու»,-նշեց գյուղացիներից մեկը։

 

 

Հարցին՝ ինչ լուծում են ակնկալում, հավաքվածներից մեկը պատասխանեց․  «Լուծումը, որ էսպես մնա, ամեն մարզում լինի բժիշկ, գա ստուգի, անասունի ստուգումները անեն, վերահսկողություն թող լինի, համաձայն ենք, մենք էլ երեխաներ ունենք, մենք էլ ենք ուզում մաքուր սնունդ լինի»։

 

Գյուղացիների հետ հանդիպեց Կոտայքի մարզպետի խորհրդական Արտավազդ Բարսեղյանը։

 

Նա գյուղացիներին ասաց որ պահանջը, որ սպանդանոց չպետք է լինի, հարցի լուծում չէ։

 

Գյուղացիներից մեկը հակադարձեց, որ սպանդանոցներից մեկից միս է գնել եւ շատ դժգոհ է․ «Ես սպանդանոցից միս եմ ուզել, բերել են, շան դեմը գցես, չի ուտի այդ միսը։ Վրան լիքը կեղտ եւ ցեխ կա, բերել է, ինչ պետք է անեմ»։

 

Մարզպետի խորհրդականն առաջարկեց՝ օրենքը կարելի է հղկել։

 

Մարզպետի խորհրդականի հետ գյուղացիները պայմանվորվեցին սպասել կառավարության քննարկմանը, եթե գյուղացիներին չգոհացնի, մարզպետարանում քննարկում կկազմակերպվի եւ կլսեն բնակիչներին։