ՀՀ գյուղատնտեսության նախարարն Արարատի մարզում այցելել է «Ոսկե կացին» սպանդանոց

ՀՀ գյուղատնտեսության նախարար Սերգո Կարապետյանն Ահլ ալ-Բեյթի Համաշխարհային Համագումարի գլխավոր քարտուղար Այաթոլլա Մոհամմադ Հասան Ախթարիի հետ այսօր Արարատի մարզի Մասիս քաղաքում այցելել է 2015 թվականի օգոստոս ամսին շահագործման հանձնված «Ոսկե կացին» ՍՊԸ-ի սպանդանոց, որտեղ մորթն իրականացվում է «հալալ» կանոնների համաձայն: 

Ներկա էին նաև ՀՀ-ում Իրանի արտակարգ և լիազոր դեսպան Սեյեդ Քազեմ Սաջադին, այլ պաշտոնատար անձինք:
«Հայաստանը Իրանի հետ կարող է համագործակցել գյուղատնտեսության բնագավառի մի շարք ճյուղերում: Մասնավորապես, երկկողմ փոխգործակցության համար առավել հեռանկարային են այն ոլորտները, որոնցում Իրանն ունի բավականին մեծ առաջընթաց` սերմնաբուծությունը, պտղաբուծությունը, կաթիլային ոռոգումը», - նշել է նախարար Սերգո Կարապետյանը:
Նախարարը համագործակցության հնարավոր ուղղություններից է համարել նաև հայ-իրանական համատեղ ձեռնարկությունների հիմնումը, հատկապես անասնապահության ոլորտում` պատրաստի մսամթերքը հետագայում դեպի Իրան արտահանելու նպատակով: Այս առումով նախարարը տեղեկացրել է, որ նկատի ունենալով Իրանում Հայաստանից ներկրվող ոչխարի մսի պահանջարկը, հայկական կողմը կարող է տարեկան 250-300 հազար գլուխ ոչխար արտահանել Իրան: 
Միաժամանակ նախարարը հավաստիացրել է, որ Հայաստանի կառավարությունը պատրաստ է աջակցել հարևան երկրի ներկայացուցիչներին Հայաստանում ներդրումներ իրականացնելու գործում։ 
Այաթոլլա Մոհամմադ Հասան Ախթարին իր հերթին բարձր է գնահատել հայ-իրանական հարաբերությունները քաղաքական, տնտեսական և մշակութային ոլորտներում: Նա նաև հավելել է, որ շնորհիվ բարձր որակական հատկանիշների` Իրանում մեծ է հատկապես հայկական անասապահական և թռչնաբուծական ատրադրանքի, կաթնամթերքի և մսամթերքի պահանջարկը:
Սպանդանոցում նախարարի շրջայցի ընթացքում գլխավոր տնօրեն Առնոլդ Մանուկյանը տեղեկացրել է, որ գործունեության սկզբում այստեղ 1 հերթափոխի ընթացքում մորթի էին ենթարկվում 700 գլուխ կենդանիներ, ներկայումս այդ թիվը հասցվել է 1000 գլխի, և նախատեսվում է հետագայում 1 հերթափոխում իրականացնել 1500 գլուխ կենդանու մորթ: Մինչև հաջորդ տարվա մայիս ամիսը նախատեսվում է կազմակերպել նաև խոշոր եղջերավոր կենդանիների մորթ: Այժմ շինարարական աշխատանքներ են տարվում խոշոր եղջերավոր կենդանիների մորթի հոսքագիծ կառուցելու նպատակով: