Ոստիկանի սպանության մեջ մեղադրվող անչափահաս եղբայրների քույրն ու եղբայրը տեղափոխվել են ՀՕՖ կենտրոն

 

Երեւանում ոստիկանի սպանության մեջ մեղադրվող անչափահաս եղբայրների քույրն ու եղբայրը տեղափոխվել են «Երեխաների աջակցության կենտրոն» (ՀՕՖ) եւ  հաճախում են դպրոց: Այս մասին ֆեյսբուքյան իր էջում գրառում է արել ԱԺ փոխխոսնակ Լենա Նազարյանը:

 

Գրառման մեջ, մասնավորապես, ասվում է.

 

«Երկու ամիս առաջ անչափահաս եղբայրների կողմից Երեւանում ոստիկանի սպանության դեպքից հետո, հայտնի դարձավ նաեւ նրանց ընտանիքի պատմությունը: Պարզվեց՝ ընտանիքում կա եւս երկու անչափահաս. տեսանյութում երեւում է, որ 9 տարեկան Նորայրը եւ 12 տարեկան Գոհարն ապրում են ծայրահեղ վատ պայմաններում, չեն հաճախում դպրոց եւ իրենց ուժերից վեր տնային աշխատանք են կատարում:

 

Երեխաների սոցիալական իրավունքների պաշտպանության հարցում պետական մարմնի ձեռնարկած քայլերի մասին տեղեկանալու համար, դիմել էի ՀՀ աշխատանքի եւ սոցիալական հարցերի նախարարություն: Կարծում եմ բոլորի համար է կարեւոր իմանալ, որ այժմ երեխաների խնամքն իրականացվում է «Երեխաների աջակցության կենտրոնում» (ՀՕՖ) եւ նրանք հաճախում են դպրոց:

 

Անչափահասների հանդեպ կամ նրանց կողմից գործած հանցագործություններից պաշտպանության միակ ճանապարհը՝ երեխաների սոցիալական իրավունքների պաշտպանությունն է»:

 

Հիշեցնենք, որ Արաբկիրի պահպանության բաժնի ոստիկանները հոկտեմբերի 16-ի գիշերը հետապնդելով Ազատության պողոտայում բռնել էին իրենց նկատած ու փախուստի դիմած, 2003 եւ 2001 թվականներին ծնված 2 եղբայրներին: Նրանցից մեկը խլել էր ոստիկաններից մեկի հաշվեցուցակային ատրճանակն ու կրակելով սպանել 38-ամյա ոստիկան Տիգրան Առաքելյանին: Դեպքի առթիվ հարուցվել է քրեական գործ՝ ՀՀ քրեական օրենսգրքի 238-րդ հոդվածի 1-ին մասով, 316-րդ հոդվածի 2-րդ մասով եւ 104-րդ հոդվածի 1-ին մասով: