Ի՞նչ պետք է իմանալ կերամիկական սալիկների մասին

Կերամիկական սալիկը հիմնականում թրծած կավից պատրաստված ուղղանկյուն կամ քառակուսի սալիկ է, որի մի կողմը ծածկված է փայլով: Մարդիկ առաջին անգամ շինությունների մակերեսները ծածկելու համար կերամիկական սալիկներ օգտագործել են Միջագետքում: 

Դա եղել է մ.թ.ա. 3-րդից 2-րդ հազարամյակներում: Այնուամենայնիվ, այն ժամանակ օգտագործված սալիկներն իրենց չափերով ավելի շատ նման են եղել խճանկարի՝ մոզայիկայի, այլ ոչ թե կերամիկական սալիկների, բայց դրանցով էլ հին վարպետները ստացել են լիարժեք պատկերներ ու նախշեր: Այդ հին սալիկները պատրաստել են կավից ուղղանկյունների տեսքով, որը հետո թրծել են կրակի մեջ:

 Ընդ որում, դրանց որակը այնքան լավն է եղել, որ որոշ նմուշներ գոյատևել են անգամ մինչև մեր օրերը: Երբեմն կավե սալիկները պատրաստվել են տարածական նկարների ձևով, բայց հիմնականում դրանք ուղղակի նախշազարդվել են: 

Կերամիկական սալիկները մեզ ծանոթ ձևով հայտնվել են միայն մ.թ.ա. 1-ին հազարամյակում՝ հին պարսկական Ահամդիդների դինաստիայի դարաշրջանում:

 Սուզե և Պերսեպոլիս քաղաքների պեղումների ժամանակ հայտնաբերվել են 15х15 սմ չափերի և 10 մմ հաստության կերամիկական սալիկներ: 

Մեթլախ սալիկները իրենց անունը ստացել են գերմանական Մեթլախ քաղաքի անունից, որտեղ միջին դարերից պատրաստել են դրանք: Այնպես, ինչպես հազարամյակներ առաջ, հիմա էլ կերամիկական սալիկները երեսապատման ամենատարածված միջոցներից են:

 Եվ դրա համար կան պատճառներ: Նախ՝ կերամիկական սալիկները շատ ամուր են: 

Գոյություն ունեն կերամիկական սալիկների միջազգային ստանդարտներ, և ըստ այդ ստանդարտների, սալիկները լինում են երեք տեսակի. 1-ին տեսակը նշվում է կարմիրով, 2-րդը՝ կապույտով, իսկ 3-րդը կանաչով: 

Արտաքին սալիկապատման համար նախատեսված սալիկների փաթեթավորման վրա լինում են AI կամ BI նշաններ, որոնք ցույց են տալիս, որ նման սալիկները գերազանց են դիմանում խոնավությանը և կարող են օգտագործվել անգամ հիդրոկառույցների՝ լողավազանների, շատրվանների և այլն, երեսպատման համար:

Եթե սալիկների փաթեթավորման մեջ առկա է ձյան փաթիլի տեսքով խորհրդանշան, ապա դա նշանակում է, որ սալիկը ունի սառնամանիքային դիմադրության բարձր աստիճան: 

AII և BII նշանները հուշում են, որ սալիկը կարող է օգտագործվել արտաքին սալիկապատման համար, բայց այն չունի այնպիսի ջրակայունություն, ինչպիսին ունեն AI-ը և BIը: AIII և BIII կարգերի սալիկները նախատեսված են բացառապես ներքին հարդարման համար:

 Այս ամենից բացի, սալիկները համապատասխանաբար դասակարգվում և պիտակավորվում են՝ կախված նրանից, թե ինչ մակերեսի վրա են ամրանալու: Օրինակ՝ ոտնաթաթի տեսքով խորհրդանշանը ցույց է տալիս, որ այդ սալիկը նախատեսված է հատակը սալիկապատելու համար: 

Ընդ որում, եթե այդ խորհրդանշանը պատկերված չէ մութ ֆոնի վրա, այլ բաց ֆոնին է կամ գծանշված, ապա դա ցույց է տալիս սալիկի մաշվածության նկատմամբ բարձր դիմադրողականության մասին: Պատերի սալիկապատման համար նախատեսված սալիկների փաթեթավորման վրա լինում է ձեռքի պատկերանշան: 

Նման սալիկները չի կարելի օգտագործել հատակների համար, քանի որ, չնայած ամրությանը, դրանք չեն կարող դիմանալ ծանրությանը: 

Ընդհանրապես, կերամիկական սալիկներ ընտրելիս պետք է խստորեն հետևել արտադրողների ցուցումներին: 

Սալիկապատող վարպետները սովորաբար նախընտրում են աշխատել մեծ չափերի սալիկներով, քանի որ փոքրերը տեղադրելու համար զգալիորեն ավելի շատ ժամանակ է պահանջվում, հետևաբար, դրանց տեղադրման գինը լինում է ավելի բարձր:

 

Նյութը հրապարակման պատրաստեց Past.am-ը