Վիեննական աթոռներ. պարզ, թեթև, գեղեցիկ

Բոլորն են սիրում գեղեցիկ և հարմարավետ կահույք: 

Եվ նման կահույքի տեսակներից մեկը ամենահայտնի և սիրված վիեննական աթոռն է: Դրա առանձնահատկությունն այն է, որ պատրաստվում է հաճարի ճկված փայտանյութից: Այս տեխնոլոգիան հորինել է ավստրիացի ատաղձագործ Մայքլ Թոնեթը 19-րդ դարի կեսերին: Առաջին անգամ վիեննական ավանդական աթոռների արտադրություն սկսել է իրականացնել Թոնեթ եղբայրների գործարանը: 

Բացի այդ, նրանք դիզայներական կահույքի զանգվածային արտադրության պատմության մեջ դարձել են առաջամարտիկներ: Աթոռներն իրենց համբավը ձեռք են բերել շնորհիվ բացառիկ արտաքին գեղեցիկ տեսքի, պարզության և թեթևության, ինչպես նաև համեմատաբար էժան գնի պատճառով: 

Այս հատկությունները հայտնվել են Թոնեթ եղբայրների աշխատանքի շնորհիվ, որոնք աթոռի մաս հանդիսացող փայտանյութի ճկման նոր մեթոդ են հորինել: 

Եթե նախկինում փայտը ճկելու համար օգտագործվել է գոլորշի, ապա եղբայրները դրանք պատրաստել են սոսնձման եղանակով: 

Այդ տեխնոլոգիայի շնորհիվ աթոռի պատրաստման համար պահանջվել է շատ ավելի քիչ փայտ, որն էլ ազդել է պատրաստի արտադրանքի գնի և քաշի վրա: 

Առաջին անգամ վիեննական աթոռներ սկսել են օգտագործել Վիեննայի սրճարաններում և ռեստորաններում, քանի որ այդ հաստատություններին պետք էին մեծ քանակի աթոռներ՝ գեղեցիկ ու էժան: 

Սա էլ նպաստել է կահույքի այդ տեսակի մասսայականացմանը: Աթոռների արտադրության տեխնոլոգիայի կատարելագործմանը զուգընթաց սկսել են արտադրվել աթոռների բազմաթիվ մոդելներ: 1859 թվականին հայտնվել է N 14 բացառիկ մոդելը, որը վիեննական աթոռների պատմության մեջ համարվում է դասական մոդել: 

Այդ մոդելը բաղկացած է վեց տարրերից և 10 պտուտակներից, որոնք պետք են հավաքման համար: Մինչև Առաջին համաշխարհային պատերազմը արտադրվել է 50 միլիոն հատ N 14 աթոռ: 

Աթոռները պատվիրատուներին առաքվել են հարթ փաթեթավորմամբ, քանդված վիճակում, ինչն իր հերթին ազդել է դրանց տեղափոխման հարմարավետության և էժանության վրա: 

Հավանաբար հավաքվող կահույքի վաճառքի գաղափարը, որը հեշտ է տեղափոխել և հավաքել տանը, հանրահայտ IKEA ընկերության հիմնադիր Ինգվար Կամպրադի մոտ առաջացել է այն բանից հետո, երբ նա տեսել է վիեննական աթոռների հսկայական ժողովրդականությունը: Խորհրդային Միությունում վիեննական աթոռի պատմությունը կրկնվել է, և դրանք սկզբից օգտագործվել են ռեստորաններում և սրճարաններում: 

Դրանց հսկայական քանակ ներկրվել է դեռևս ցարական Ռուսաստանի ժամանակ, և անգամ 1917 թվականին Tonet ընկերության ներկայացուցչության փակվելուց հետո էլ այդ աթոռները չեն անհետացել մարդկանց տներից, և մինչ օրս էլ կարելի է հանդիպել դրանց: 

Ներկայումս վիեննական աթոռները պատրաստված են նաև թեթև ալ յումինից, իսկ նստատեղերը՝ կաշվի փոխարինիչներից: 

Չնայած դրան, այդ աթոռները ևս հանրաճանաչ են և մեծ պահանջարկ ունեն, քանի որ օգտագործվում են գրասենյակներում, ռեստորաններում և հանրային այլ վայրերում:

Նյութը հրապարակման պատրաստեց Past.am-ը