Չինաստանը պլանավորում է կառուցել կենդանիների կլոնավորման գործարան

Չինաստանը պլանավորում է կառուցել աշխարհի ամենամեծ՝ կենդանիների կլոնավորման գործարանը, որը կարտադրի շներ, ձիեր ու տարեկան մինչև 1 մլն տավարի միս-տեղեկացնում է Past.am-ը:

Ըստ պաշտոնական տեղեկությունների՝ 20,5 մլն ֆունտ-ստեռլինգով կառուցվելիք գործարանը հովանավորվելու է չինական բիոտեխնոլոգիական «Բոյալայֆ» ֆիրմայի և հարավկորեական «Սուեմ Բայոթեք» ընկերության կողմից: Այն ընդգրկելու է կլոնավորման լաբորատորիաներ:

Նոր գործարանը կառուցվելու է Տիանջին հյուսիսային նավահանգստում: Գործարանի նպատակն է արտադրել ընտանի և ոստիկանական շներ, ձիարշավի ձիեր և կովեր, որոնք հետագայում կվաճառվեն բաց շուկայում: Արտադրությունը կսկսվի մյուս տարի: «Չինացի ֆերմերները ջանում են բավական տավարի միս արտադրել շուկայի պահանջները բավարարելու համար»,- ասել է «Բոյալայֆի» ղեկավարը:

Այնուամենայնիվ, սոցիալական լրատվամիջոցները չեն հավատում, որ մարդիկ կցանկանան ուտել կլոնավորված միս: Նրանք նշում են այն փաստը, որ գործարանի կառուցման վայրը հենց այն տեղն է, որտեղ քիմիական պայթյուններից օգոստոսին 165 մարդ մահացավ: Բացի այդ, Չինաստանում սննդի անվտանգությունը ցածր մակարդակի վրա է: Այս երևույթը բողոքի ալիք է բարձրացրել մարդկանց շրջանում, ովքեր պնդում են, որ կլոնավորված մսից առաջինը պիտի պետության ու կառավարության ներկայացուցիչները ուտեն, ապա հրամցնեն ժողովրդին: