Ալավերդիի նոր փոսալցված ճանապարհների աշխատանքները նույնիսկ գերազանցում են պահանջվող չափորոշիչների սանդղակը (տեսանյութ)

Ալավերդի քաղաքում նոյեմբերի սկզբից վերանորոգվում են համայնքային ճանապարհները: Փոսանորոգումների ծրագրի նախահաշվարկային արժեքը կազմում է 19 մլն. 650 հազար դրամ, որի մի մասը համայնքն է ներդրում կատարել (45տոկոս), մյուս մասը փոխանցվելու է սուբվենցիոն ծրագրով  (55տոկոս):

Դեռ մայիս ամսին հայտարարված մրցույթին ոչ մի կազմակերպություն չի մասնակցել: Չորրորդ անգամ հայտարարվսծ մրցույթում միանձնյա կարգով ճանապարհաշինարարական փոսալցումների աշխատանքը վստահվել է «ՍՏԱԳ» ՍՊԸ-ին, որը գրանցված է Վանաձոր քաղաքում:

Past.am-ի աշխատակիցը առանց զգուշացնելու մեկ ամբողջ օր գտնվում էր Ալավերդի քաղաքում` նպատակն էր վերահսկել, ականատես լինել «Ստագ» ՍՊԸ-ի կողմից իրականացվող աշխատանքներին:

Ճանապարհաշինարարական աշխատանքի ողջ ընթացքում այնտեղ էր «ՍՏԱԳ» ՍՊԸ-ի պատասխանատու ներկայացուցիչ` Հարություն Ասլանյանը, ով դեմ չեղավ տեսախցիկի աշխատանքին և այն առաջարկին, որպեսզի մեր աչքի առջև իրականացվեն այնպիսի միջոցներ, որոնցով հնարարավոր կլինի գոնե մասնակի ստուգել կատարվող գործի որակը:

Այնուհետև կապ հաստատեցինք Լոռու մարզպետարանի քաղաքաշինության վարչության պետ Արմեն Ջանազյանի հետ:

- Պրն. Ջանազյան դուք կրկին հաստատո՞ւմ եք, որ դժգոհ եք փոսալցումների աշխատանքից:

- Տեղեր կան, որ նորից պիտի գործը արվի: Երեկվա դրությամբ տրանսպորտի ու ճանապարհաշինության բաժնի պետի պաշտոնակատար Վահրամ Ղարասյանը տեղում հանդիպել է աշխատանքը իրականացնողների հետ: Ունենք պայմանավորվածություն, որ ավարտից հետո պիտի մասնագիտական լաբորատոր հետազոտություն լինի և եթե անհամապատասխանություն գրանցվեց կրկին կաշխատեն, շտկելու համար: Սայն նշեմ, որ ընդհանուր նորմալ ձևով աշխատել են , ուղղակի հիմա վերահսկողությունը ավելի խիստ է դրված:

Թեմայի շրջանակներում խոսեցինք նաև Ալավերդու քաղաքապետ Սասուն Խեչումյանի հետ:  

Վերջինս էլ իր հերթին նշեց, որ աշխատանքի ընթացքում կլինեն փոքր թերացումներ, որ իրենք «Ստագ» ՍՊԸ-ի հետ արդեն ունեն երկկողմանի փոխհամաձայնություն և անհրաժեշտության դեպքում հարցին կանդրադառնան: Ընդհանուր առմամբ նրանք գոհ շինարարների աշխատանքից: