Ավարտվել է «Աջակցություն ՓՄՁ զարգացմանը Հայաստանում» (EU-SMEDA) ծրագիրը

Past.am

Նոյեմբերի 29-ին Երեւանում կայացել է «Աջակցություն ՓՄՁ զարգացմանը Հայաստանում» (EU-SMEDA) ծրագրի պաշտոնական փակման միջոցառումը, որը կրում էր «Հաջողությունների ներկայացում, արդյունքների ամփոփում» խորագիրը։

 

«Աջակցություն ՓՄՁ զարգացմանը Հայաստանում» ծրագիրը համաֆինանսավորվել է Եվրոպական միության եւ Գերմանիայի դաշնային հանրապետության տնտեսական համագործակցության եւ զարգացման նախարարության կողմից։ Որպես «ԵՄ-ն հանուն բիզնեսի» նախաձեռնության առանցքային նախագիծ, ծրագիրն  իրականացվել է 2016-2019 թվականների ընթացքում, ունենալով մեկ նպատակ՝ էապես նպաստել մասնավոր հատվածի զարգացմանը Հայաստանում, հզորացնելով ՓՄՁ ոլորտը ինչպես մակրո, այնպես էլ մեզո եւ միկրո մակարդակներում։ Գործունեության չորս տարվա ընթացքում ծրագիրը ոչ միայն լիարժեք կերպով ծառայել է սահմանված նպատակների իրագործմանը, այլեւ գերազանցել է նախանշված թիրախները՝ նախագծի հինգ բաղադրիչների շրջանակում նախատեսված իր միջոցառումների մեծ մասով։ Դրանով իսկ «Աջակցություն ՓՄՁ զարգացմանը Հայաստանում» (EU-SMEDA) ծրագիրը ծառայել է իբրեւ օրինակ եւ կատալիզատոր այն ոլորտների համար, որոնց աջակցել է՝ նպաստելով դրանց զարգացմանը։

 

Միջոցառմանը ողջույնի խոսքով հանդես են եկել ՀՀ էկոնոմիկայի նախարարի տեղակալ Նաիրա Մարգարյանը, Հայաստանում Եվրոպական միության դեսպան, ԵՄ պատվիրակության ղեկավար Անդրեա Վիկտորինը, Հայաստանում Գերմանիայի փոխդեսպան Կլաուս Վենդելբերգերը, Գերմանիայի միջազգային համագործակցության ընկերության (GIZ) հայաստանյան ծրագրի ղեկավար Աննե Կեմպան։

 

ՀՀ էկոնոմիկայի նախարարի տեղակալ Նաիրա Մարգարյանն իր ողջույնի խոսքում նախարարության եւ իր անունից շնորհակալություն է հայտնել Եվրոպական միության եւ  Գերմանիայի միջազգային համագործակցության ընկերության գործընկերներին՝ նշելով, որ համագործակցությունը շատ հաջողված էր եւ արդյունավետ։ «Ես ներսից եմ տեսել աշխատանքը, տեսել եմ, թե  ինչ ոգեւորությամբ եւ նվիրումով են աշխատել բոլորը, եւ այդ աշխատանքի հաջողության վկայություններն ակնհայտ են։ Այսօր մենք ունենք ՓՄՁ արհեստավարժ ռազմավարություն, եւ ես վստահ եմ, որ իմ եւ մեր առաջիկա հաջողությունները նաեւ դրանով են պայմանավորված լինելու։ Մենք կհասնենք մեր նպատակներին», - ասել է էկոնոմիկայի փոխնախարարը։ Նա հույս է հայտնել, որ լավ հիմքերի վրա դրված համագործակցությունը շարունակություն կունենա եւ ապագայում կգրանցվեն ավելի մեծ հաջողություններ։

 

Պանելային քննարկումների ժամանակ Նաիրա Մարգարյանը խոսել է նաեւ մեկ այլ հաջողված ծրագրի՝ նախարարության աշխատակիցների կարողությունների զարգացման նպատակով համատեղ ջանքերով կազմակերպված եւ իրականացված  «Հանրային կապեր եւ հաղորդակցություն» եւ «Նամակագրության հիմնական սկզբունքները» թեմաներով դասընթացի մասին, որն անցկացրել է Հայկական Փի Ար ասոցիացիան։ Փոխնախարարի համոզմամբ, դա լավ սկիզբ էր, որը պետք է շարունակել, քանի որ նման դասնընթացները ոչ միայն գիտելիք եւ հմտություններ են փոխանցում, այլեւ դրականորեն փոխում են մթնոլորտը։

 

Ավելի քան չորս տարի  «Աջակցություն ՓՄՁ զարգացմանը Հայաստանում» (EU-SMEDA) ծրագիրը ծավալել է իր գործունեությունը տարբեր  մակարդակներում՝ ուղղված Հայաստանում փոքր եւ միջին ձեռնարկությունների աջակցությանը՝ շեշտը դնելով հինգ արդյունքային ոլորտների եւ փոխկապակցված թեմաների շրջանակի վրա։ Ավելի քան 200 միջոցառումների շրջանակում առաջարկվել է գործնական կապերի հաստատումից մինչեւ վերապատրաստման դասընթացների եւ ուսումնական այցերի միջոցով տրամադրվող մասնագիտական ուղղորդում, որից օգտվել է մոտ 3500 ընկերություն եւ սթարթափ՝ ստեղծելով ավելի քան 450 նոր աշխատատեղ, առաջ մղելով նոր գաղափարներ եւ նպաստելով հավելյալ արժեքի ու 150-ից ավելի նոր բիզնես միավորների ստեղծմանը։

 

Մասնավոր հատվածը, քաղաքացիական հասարակությունն ու կառավարական կառույցները ներկայացնող տարբեր շահառուների հետ դինամիկ փոխգործակցությունը, ինչպես նաեւ կարիքներին արձագանքումը կարեւոր նշանակություն են ունեցել ծրագրի գործունեության ազդեցության համար։