Ինքնաթիռի պատկանելիության մասին տեղյակ չենք եղել, նախազգուշացրել ենք 10 անգամ. Թուրքիայի ԶՈՒ-ն հայտարարություն ու ձայնագրություն է տարածել

Tert.am-ը գրում է.

Թուրքիայի զինված ուժերի գլխավոր շտաբը հայտարարություն է տարածել թուրք-սիրիական սահմանի մոտ խոցված ռուսական Սու- 24 ինքնաթիռի մասնակցությամբ միջադեպի վերաբերյալ։

Գլխավոր շտաբի կայքում տեղադրված հաղորդագրության համաձայն՝ Թուրքիայում ՌԴ ռազմական կցորդը հրավիրվել է Թուրքիայի ԶՈՒ գլխավոր շտաբ, նրա հետ քննարկվել ու կարծիքներ են փոխանակվել միջադեպի վերաբերյալ:

Համաձայն թուրքական կողմի պնդումների՝ ռազմական ինքնաթիռը խփելու պահին իրենք չեն իմացել, թե ում է պատկանում այն: Իրենք 10 անգամ կրկնել են նախազգուշացումը, սակայն օդաչուները չեն արձագանքել, ինչից հետո միայն կրակ է բացվել:

Օդաչուներին գտնելու և փրկելու համար «Թուրքայի Հանրապետությունն ու զինված ուժերը մեծ ջանքեր են գործադրել»:

Հաղորդագրության մեջ նշվում է, որ իրենք ՌԴ-ի ցանկացած հարցի պատասխանել են,հրապարակել են ինքնաթիռի հետագիծը պատկերող քարտեզը:

Մեկ այլ հաղորդագրությամբ թուրքական ԶՈՒ-ն ներկայացրել է ձայնագրությունը, որում լսվում է, թե ինչպես են անգլերենով զգուշացնում ռուս օդաչուներին՝ դեռ Թուրքիայի սահմանը չհատած։

Ձայնագրության մեջ լսվում է, թե ինչպես են Թուրքիայի ԶՈՒ ներկայացուցիչները նախազգուշացնում իրենց սահմաններին մոտեցող «չճանաչված ինքնաթիռին»:

«Խոսում է Թուրքիայի օդուժը՝ «guard» ալիքից: Դուք մոտենում եք Թուրքիայի օդային տարածքին, անհապաղ փոխեք ձեր ուղղությունը դեպի հարավ»,-ասված է զգուշացման մեջ:

Դրանից հետո թուրքական զինված ուժերին պատկանող F-16 կործանիչների արձակած հրթիռից խոցվել է ինքնաթիռը: Ռուս օդաչուները հասցրել են ինքնանետվել այրվող ինքնաթիռից:
Նշվում է, որ F-16-երը հարված հասցնելուց առաջ չեն նախազգուշացրել։

Հիշեցնենք, որ նոյեմբերի 24-ին ռուսական ռազմական ինքնաթիռ էր կործանվել Սիրիայում։ ՌԴ նախագահ Վլադիմիր Պուտինը հայտարարել էր, որ ինքնաթիռը խփվել է թուրքական F-16 կործանիչից արձակված «օդ-օդ» տիպի հրթիռով և ընկել է Սիրիայի տարածքում՝ Թուրքիայի սահմանից 4 կմ հեռու։ Ռուսաստանի նախագահը տեղի ունեցածը «թիկունքից հարված» էր որակել, որն արվել է հօգուտ ահաբեկիչների։