Ռուսաստանը պատժամիջոցներ է սկսել Թուրքիայի նկատմամբ

Ռուսաստանյան Սու-24 ինքնաթիռը թուրքական օդուժի կողմից Սիրիայի տարածքում խոցվելու հետ կապված ռուս-թուրքական հարաբերությունների գերլարված ֆոնին Ռուսաստանն առաջին պատժամիջոցներն է սկսել կիրառել Թուրքիայի նկատմամբ:

Ինչպես հաղորդում է թուրքական Demokrat Haber կայքը` հղում կատարելով Թուրքիայի ամենամեծ Natali Tours տուրիստական օպերատորին, հայտնում է, որ ռուսաստանյան տուրիստական գործակալությունները ժամանակավորապես դադարեցրել են Թուրքիա շրջագայությունների տոմսերի վաճառքը` նշելով, որ դա կապված է «անորոշ քաղաքական վիճակի հետ»:

Թուրքիա տուրիստական փաթեթների վաճառքը դադարեցնելու մասին հայտարարել է նաեւ ռուսաստանյան Ros Turizm տուրիստական գործակալությունը:

Նշվում է, որ ՌԴ ֆինանսների նախարարությունը խոստացել է փոխհատուցել ստեղծված իրավիճակի հետ կապված ռուսաստանյան տուրիստական գործակալությունների վնասները:

Ռուսաստանը Թուրքիայի դեմ պարենամթերքի պատերազմ էլ է սկսել:

«ՌԻԱ Նովոստի»-ն հաղորդել է, որ «Ռոսսելխոզնադզոր»-ը դեկտեմբերի 1-ից ժամանակավոր սահմանափակումներ է մտցնում Թուրքիայից Ռուսաստան թռչնամսի ներկրման վրա: Սահմափակումներ են  մտցվել թուրքական CP Standart Gida Sanayi եւ Ticaret Anonim Sirkorti ընկերությունների արտադրանքի վրա` այն պատճառով, որ թռչնամսում մարդու առողջության համար վնասական բակտերիաներ են հայտնաբերվել:

Նոյեմբերի 24-ին ռուսաստանյան Սու-24 ինքնաթիռը Սիրիայի տարածքում թուրքական սահմանից 1 կմ հեռավորության վրա կործանվել է Թուրքիայի օդուժի կողմիցարձակված «երկինք-երկինք» հրթիռով եւ վայր ընկել Թուրքիայի սահմանից 4 կմ հեռավորության վրա: Երկու օդաչուներն էլ կատապուլտվել են:

ՌԴ նախագահ Վլադիմիր Պուտինն այդ իրադարձությունն անվանել է «ահաբեկիչների հանցակիցների կողմից ՌԴ թիկունքին հարված» եւ նշել, որ ինքնաթիռի հետ կապված ողբերգությունը «լուրջ հետեւանքներ է ունենալու Մոսկվայի եւ Անկարայի միջեւ հարաբերությունների համար»: