Առաջ­նա­յին են ոչ թե Հա­յաս­տա­նի Սահ­մա­նադ­րու­թյու­նը և օրենք­նե­րը, այլ արևմ­տյան հա­սա­րա­կա­կան կազ­մա­կեր­պու­թյուն­նե­րի կա­նո­նադ­րու­թյու­նները

nvo.ng.ru-ն «Օտար աշխարհաքաղաքական շահերի ուղեծրում. ԱՄՆ-ը փորձում է Հայաստանը վերածել իր պլացդարմի» վերնագրով հոդվածում գրում է, որ անցած տասնամյակում հետխորհրդային մի շարք երկրներ անցել են հեղափոխությունների անցուղիներով, և ժողովուրդները, որոնք ավանդաբար ունեցել են ընդհանուր պատմություն և բարոյահոգևոր արժեքներ Ռուսաստանի հետ, վերաշարադրել են իրենց պատմությունը այնպես, որ Մոսկվան պատկերվում է բացառապես ոչ գրավիչ տեսանկյունից: Արևմտյան քաղտեխնոլոգները մարդկանց գիտակցության համակարգված բարդ մշակման միջոցով հրահրում են ատելություն Ռուսաստանի նկատմամբ:

Նման մշակման զոհ է դարձել նաև հայ ժողովուրդը: 2018 թվականի ապրիլին «թավշյա հեղափոխություն» կոչվող քաղաքական կեղծիքի միջոցով նախկին նախագահ Սերժ Սարգսյանը իշխանությունը փոխանցել է Նիկոլ Փաշինյանին: 

Եվ այս իրադարձությունից մեկուկես տարի անց Հայաստանը ոչ միայն չի դարձել ժողովրդավարական երկիր, այլ վերածվել է ավտորիտար պետության, որտեղ առաջնային են ոչ թե Հայաստանի Սահմանադրությունը և օրենքները, այլ արևմտյան հասարակական կազմակերպությունների (ՀԿ-ների) կանոնադրությունները:

 

Հայաստանը հայտնվել է ԱՄՆ-ի աշխարհաքաղաքական շահերի ուղեծրում՝ դրան հաջորդող բոլոր մշակութային, տնտեսական և ավանդական արժեքային բացասական հետևանքներով: Հայաստանը հայտնվել է ՀԿների սարդոստայնում: 

Բանն այն է, որ 20102017 թվականներին Հայաստանը միտումնավոր ողողվել է արևմտյան հասարակական կազմակերպություններով, հիմնադրամներով և աղանդներով: 

Նպատակը հասկանալի է. ավանդական քրիստոնեական արժեքների արժեզրկման, ընտանիքի և դարավոր ավանդույթների ոչնչացման միջոցով հայկական պետականության թուլացումը: 

Ռուսաստանը, ավանդաբար առանց սեփական կանոնների պարտադրման, հարաբերություններ և կապեր է պահպանում հետխորհրդային երկրների կառավարությունների հետ: Իսկ ԱՄՆ-ը, օգտագործելով մեթոդների լայն զինանոց, ներառյալ՝ կեղտոտ, անմիջականորեն է աշխատում ժողովրդի հետ: 

Գտնում է երիտասարդ, հավակնոտ, հասարակական կարծիք ձևավորելու ունակ ապագա առաջնորդների, մարզում, սնուցում անհրաժեշտ գաղափարական բովանդակությամբ և այդպիսով զրոյից ձևավորում նոր էլիտա: 

Հայաստանում գործում են պետություններ ոչնչացնող ճանաչված մասնագետ Սորոսը, ինչպես նաև այնպիսի աղանդներ, ինչպիսիք են «Եհովայի վկաները», «Կյանքի խոսքը» և այլն: Այս աղանդները Հայաստանում ունեն ավելի քան 200 հազար հետևորդ, և դա՝ 2,5 միլիոն բնակչությամբ երկրում: Ըստ տեղեկությունների, Հայաստանում առկա է գրանցված և գործող ավելի քան 3,5 հազար ՀԿ, որոնց մեծ մասը ֆինանսավորվում է արտերկրից:

Հայաստանի ներկայիս կառավարությունը կազմված է արևմտյան ՀԿ-ների ներկայացուցիչներից, և ամբողջ իշխանությունը տրված է նրանց: 

Առանց ԱՄՆ-ի Պետդեպարտամենտի համապատասխան ցուցման այս կառավարությունը լիազորված չէ որևէ որոշում կայացնելու: 

Հայաստանում բաժանում են ժողովրդին: ԱՄՆ-ի ցուցումով Հայաստանի պետական կառավարման համակարգում արգելված է ռուսաստանաբնակ հայերի առկայությունը, չնայած ավանդաբար հենց ռուսաստանաբնակ հայերն են հանդիսանում նախկին ՀԽՍՀ-ի բնիկներ:

 Դրա փայլուն օրինակն է սփյուռքի հարցերով  հանձնակատարի պաշտոնում ԱՄՆ-ի Գլենդել քաղաքի նախկին քաղաքապետ Զարեհ Սինանյանի նշանակումը, որը ոչ միայն ոչինչ չգիտի Ռուսաստանի հայկական սփյուռքի մասին, այլ նաև ի պաշտոնե պետք է կոնտակտի մեջ լինի ԱՄՆ-ի ԿՀՎ-ի հետ: Փաշինյանի ռեժիմը ժողովրդին բաժանել է երկու մասի և ստեղծել փոխադարձ ատելության մթնոլորտ ինչպես հայկական սփյուռքում, այնպես էլ բուն Հայաստանում: Հայաստանում հետապնդում են այլախոհներին: 

Հայտարարված սիրո և համերաշխության հեղափոխությունը վերածվել է հաշիվների մաքրման հասարակական և քաղաքական այն գործիչների նկատմամբ, որոնք ունեն այլ հայացքներ՝ ռուսասեր են, դեմ են արտահայտվում ԼԳԲՏ համայնքին, պաշտպանում են ավանդական արժեքները և այլն: 

Հայաստանում քրեական գործեր են կարվում, ուժայինները գործում են միջնադարին բնորոշ կոպիտ ուժի կիրառման մեթոդով, և այս ամենը Հայաստանը դարձրել է երրորդ աշխարհի ավտորիտար պետություն:

 

Փաշինյանը վախեր ունի: Արտաքին և ներքին քաղաքականությունում իր անկանխատեսելի գործողությունների արդյունքում նա դարձել է Հայաստանի անվտանգության համար առաջին սպառնալիքը: 

Ոչ ոք չգիտի, թե վաղը նա ինչ նոր անհասկանալի գործողություն կկատարի: Զգացվում է, որ Փաշինյանը նկատելի նյարդայնանում է և փորձում իրականացնել քաղաքական դաշտի տոտալ մաքրում անցանկալի դեմքերից: 

Վերջերս դաշնակիցների փնտրտուքի մեջ նա անգամ սիրախաղ է սկսել ահաբեկչական «Սասնա ծռեր» կազմակերպության հետ: 

Իշխանության ներսում տիրում է միմյանց նկատմամբ խորը անվստահության մթնոլորտ, որն էլ բերում է միջին և բարձր էշելոններում պարբերաբար տեղի ունեցող հրաժարականների: 

ԱՄՆ-ի նպատակը Հայաստանը ռուս զինծառայողներից ազատելն է: 

Դա իրականացնելու համար ԱՄՆ-ը ունի ցինիկ պլան՝ անհրաժեշտ է թեժացնել հայ-ադրբեջանական հակամարտությունը: 

Եթե սկսվեն ռազմական գործողություններ, և Ռուսաստանը, որպես ՀԱՊԿ անդամ, խառնվի դրան, Հայաստանի ղեկավարությունը կարող է ռուսների ներկայությունը հայտարարել անցանկալի: 

Հայկական ԶԼՄ-ներում կթեժանա հակառուսական հիստերիան, կհիշեն կամ կմտածեն ռուս զինվորականների մասնակցությամբ միջադեպեր: Կլինեն հնարավոր սադրանքներ, ընդհուպ մինչև ռուս զինվորների համազգեստով զինված խմբերի գործողություններ իրականացնելը (այստեղ էլ հենց պետք կգա «Սասնա ծռերը»):

Պատերազմի պայմաններում, երբ տրամաբանությանը գերակշռում է էմոցիոնալ վիճակը, ռուսաֆոբ տրամադրություններ թեժացնելը հեշտ կլինի, ռուսական ռազմաբազան մարդկանց խմբերով կշրջափակեն և կհնչեն Հայաստանի տարածքից այն հանելու պահանջներ: 

Ի վերջո, նպատակն է լինելու ռուսական ռազմաբազայի դուրս բերումը և Հայաստանի դուրս գալը ՀԱՊԿ-ից և ԵԱՏՄ-ից: ԱՄՆ-ի վերջնական նպատակն է Ռուսաստանի դուրս մղումը տարածաշրջանից և Իրանի վրա հարձակվելու պլացդարմի ստեղծումը:

 

Հայաստանը այս դեպքում վերջնականապես կդառնա ԱՄՆ-ի կողմից Ռուսաստանի շուրջ ստեղծվող սանիտարական արգելագոտու մի մասը: Ահա թե ինչու է ներկայումս ամենակարևոր հարցը Հայաստանի և Ադրբեջանի միջև հնարավոր ռազմական բախման կանխարգելումը: Աշխարհի հնագույն ազգերից մեկը հանդիսացող հայերին պետք է բավականացնի իմաստությունը՝ չդառնալ ԱՄՆ-ի գլխավորած Արևմուտքի մանիպուլ յացիաների զոհ:

Մանրամասները՝ «Փաստ» օրաթերթի այսօրվա համարում