Ջրանցքում հայտնված մեքենայի մեջ արգելափակված 13-ամյա երեխան մահացավ

Ջրանցքը ընկած մեքենայի մեջ արգելափակված 13-ամյա երեխան մահացավ:  Այս մասին NEWS.am-ի թղթակցի հետ զրույցում ասաց «Սուրբ Աստվածամայր» բժշկական կենտրոնի Վերակենդանացման բաժանմունքի ղեկավար Աննա Չոբանյանը:

Նա նշեց, որ 13-ամյա երեխան այդպես էլ գիտակցության չեկավ, իսկ ստացած վնասվածքները անհամատեղելի էին կյանքի հետ:

Ավելի վաղ հայտնել էինք, որ Հայաստանի ՏԿԱԻՆ-ում, հունիսի 21-ին, ժամը 18.12-ին ահազանգ է ստացվել, որ Կուրղինյան նրբանցքի թիվ 2/5 շենքի մոտակայքում ավտոմեքենան ընկել է ջրանցքը, ներսում արգելափակված քաղաքացի (երեխա) կա. դուրս բերելու համար անհրաժեշտ է փրկարարների օգնությունը: Դեպքի վայր են մեկնել մեկ մարտական հաշվարկ, ՃԿԱԿ օպերատիվ խումբը և ՀՆՓԱԻԿ փրկարար ջոկատը: Դեռևս չբացահայտված հանգամանքներում Շրջանային և Կուրղինյան փողոցների խաչմերուկի մոտակայքից «Օպել» մակնիշի 35 SL 909 համարանիշի ավտոմեքենան դուրս է եկել ճանապարհի երթևեկելի հատվածից և հայտնվել Հրազդանի ներքին ջրանցքում:

Մինչ հրշեջ-փրկարարների կանչի վայր հասնելը ավտոմեքենայի վարորդ՝ 45-ամյա Ա. Ս.-ն ինքնուրույն դուրս է եկել ջրանցքից: Հրշեջ-փրկարարները ջրանցքից դուրս են բերել 13-ամյա Գ. Ս.-ին. Ա.Ս.-ն տեղափոխվել է «Մալաթիա» ԲԿ, իսկ Գ.Ս.-ն՝ «Սրբ. Աստվածամայր» ԲԿ: Բժիշկները Ա. Ս.-ին ցուցաբերել են համապատասխան օգնություն, իսկ Գ.Ս.-ի առողջական վիճակը գնահատել են ծանր:

Փրկարարները տեղի ուժերով ավտոմեքենան դուրս են բերել ջրանցքից: