«Հայաստանում տիրում է իրավաքաղաքական քաոս»

ՍԴ-ն կայացրել է աննախադեպ որոշում, որովհետև մեկ տարի է, ինչ ՀՀ-ում տիրում է ոչ թե օրենքի գերակայություն, այլ զանգովի և միջամտությամբ իրականացվող արդարադատություն: «Փաստի» հետ զրույցում նման տեսակետ հայտնեց «Քաղաքացիական հարթակ» ՀԿ ղեկավար Աղվան Պողոսյանը՝ անդրադառնալով ՍԴ որոշմանը հաջորդած քննարկումներին, պնդումներին ու դրանց քաղաքական բաղադրիչին:

Ա. Պողոսյանը նախ ընդգծեց. «Երկրորդ նախագահ Ռոբերտ Քոչարյանի նկատմամբ տեղի է ունեցել ապօրինությունների շարք:

Եվ ՍԴ-ն եկավ փաստելու, որ Ռ. Քոչարյանի նկատմամբ տեղի ունեցողը զուտ քաղաքական բաղադրիչ էր կրում: Եվ, բնականաբար, այդ որոշումը դուր չեկավ իշխանություններին, որոնք քաղաքական դրդապատճառներից ելնելով՝ ամեն գնով փորձում էին Ռ. Քոչարյանին կալանքի տակ պահել»:

Մեր զրուցակիցը շեշտեց, որ այսօր Հայաստանում կա անարխիա:

«Իսկ իշխանությունը, փոխանակ հասարակության կյանքը լավացներ, ավելի վատ իրավիճակ է ստեղծում, ինչի հետևանքով մենք այսօր արդեն տեսնում ենք, թե օր օրի ՀՀ-ի առջև ինչպիսի խնդիրներ են առաջացել: Բնականաբար, ՍԴ-ի որոշումը պետք է վախեցներ ինչպես իշխանական, այնպես էլ, այսպես ասած, անկախ փաստաբանի անվան տակ գտնվող որոշ շրջանակների, որոնք ուղղորդվում են Նիկոլ Փաշինյանի իշխանության կողմից»,-ասաց նա՝ հավելելով, որ ստեղծված իրավիճակը շատ վատ ցուցիչ է:

«Ռ.Քոչարյանի գործը, ՍԴ որոշումը, իսկ դրանից առաջ որոշ դատավորների կողմից արդարացի վճիռներ կայացնելն ու դրանց հետևող գործընթացները փաստում են, որ Հայաստանում տիրում է իրավաքաղաքական քաոս:

Նիկոլ Փաշինյանի իշխանությունն ամբողջովին կազմաքանդում է ՀՀում կայացած ինստիտուտները:

Նիկոլ Փաշինյանի իշխանությունը զբաղված է դատական իշխանության վրա իր ունեցած ազդեցության տարածմամբ, ինչն արգելում է մեր Սահմանադրությունը:

Մեծ հաշվով, դատարանների շրջափակումը, գաղտնալսումները ցույց են տալիս, որ այս ամենը գործող իշխանությունների համար վատ ավարտ է ունենալու. իրենք օրերից մի օր կանգնելու են սահմանադրական կարգը տապալելու մեղադրանքի առջև»,-ընդգծեց Ա. Պողոսյանը:

Անդրադառնալով ներքաղաքական իրավիճակին, իշխանության ներսում առկա գործընթացներին՝ Աղվան Պողոսյանն իրավիճակը հասկանալի որակեց:

«Իշխանության ներսում տիրող իրավիճակը հասկանալի է: Սա ցույց է տալիս, որ Ն. Փաշինյանը չի տիրապետում իրավիճակին: Այսօր նույն «Իմ քայլը» դաշինքում ևս տիրում է անկառավարելի իրավիճակ:

Այսինքն, անկառավարելիության այն քաոսը, որը տիրում է ամբողջ երկրում, առկա է նաև իշխանության ներսում.

մենք տեսնում ենք իշխանության տարբեր թևերում գտնվող ներկայացուցիչների տարաձայնություններ, մամուլում առկա արտահոսքեր: Այս ամենը խոսում է միայն մի բանի մասին. իմքայլական ֆրակցիան կամ ամբողջ իշխանությունը, որը ձևավորել է Նիկոլ Փաշինյանը, կանգնած է պառակտման եզրին:

Եվ շատ հնարավոր է, որ առաջիկա մի քանի ամիսների ընթացքում ամբողջական պառակտում տեղի ունենա»,- ասաց Ա. Պողոսյանը:

Խոսելով Արցախում սեպտեմբերի 8-ին կայանալիք ՏԻՄ ընտրությունների շուրջ առաջացած աղմուկից, մեր զրուցակիցը նշեց, որ այդ աղմուկն անտեղի չէ, քանի որ կան վտանգներ:

Նշենք, որ ՀՀ կառավարությունը որպես դրամաշնորհ մոտ 34 միլիոն դրամ է հատկացրել ՏԻմ ընտրություններում դիտորդական առաքելություն իրականացնելու համար, որը տրամադրվել «Իրազեկ քաղաքացիների միավորում» ՀԿ-ին և «Թրանսփարենսի ինթերնեշնլ» հակակոռուպցիոն կենտրոնին։

«Նիկոլ Փաշինյանը կամ այն մութ ուժերը, որոնք Նիկոլ Փաշինյանին բերել են իշխանության, պլանավորում են Արցախում իրականացնել այն ամենը, ինչը տեղի ունեցավ Հայաստանում»,-ասաց նա՝ ընդգծելով Արցախում հեղափոխության նախապատրաստման հնարավորության ու նպատակադրության մասին:

«Դա շատ վտանգավոր է, որովհետև 30 տարիների ընթացքում մենք, փաստացի, կանգնած ենք պետականության կորստի առաջ: Իսկ ֆորսմաժորային իրավիճակները անվտանգության տեսանկյունից կարող են շատ վտանգավոր լինել:

Փաշինյանն օրեցօր շատ ինտենսիվ ձևով վարկանիշ է կորցնում, և նա փորձելու է այս ամենի օջախը տեղափոխել Արցախ»,-նշեց նա՝ խնդրահարույց համարելով ՀԿ-ների ֆինանսական աղբյուրները:

«Այստեղ շատ հետաքրքիր է այդ երկու հասարակական կազմակերպությունների ընտրությունը, որովհետև ֆինանսավորվում են «սորոսական» հիմնադրամներից, որի գործունեության հիմքում շատ երկրներում պետականաքանդությունն է: 

Բացի այդ, նշյալ ՀԿ-ների ներկայացուցիչներից ոմանք հեղափոխության առաջամարտիկներից են եղել, և սա իր մեջ շատ վտանգավոր ուղերձ է պարունակում:

Արցախում ամեն պահի կարող է պատերազմ սկսվել, իսկ, իբրև թե, ժողովրդավարություն քարոզող կառույցների իրական նպատակն ապակայունացումն է, ինչը շատ վտանգավոր է: Այստեղ անելիք ունի քաղհասարակությունը, առանձին ՀԿ-ները:

Նրանք նախ պետք է հանդես գան դատապարտող կոչով՝ կապված կառավարության որոշման հետ:

Բոլոր հասարակական կազմակերպությունները, որոնք կարող են ընտրական գործընթացներւմ դիտորդական ներկայացվածություն ունենալ, օր առաջ պետք է դիմեն ՀՀ կառավարությանը և Արցախի իշխանություններին, որպեսզի այդ առաքելությունն իրենք իրականացնեն:

Այստեղ խնդիրն առաջին հերթին այն է, թե որտեղից են ֆինանսավորվում վերոնշյալ կառույցները, երկրորդը՝ ինչպե՞ս են ընտրվել, որովհետև մրցույթ չի հայտարարվել»,-ընդգծեց մեր զրուցակիցը՝ շեշտելով, որ այլ միտում էլ է տեսնում:

«Եթե մինչ այս նշված երկու ՀԿ-ները ներկայացված չեն եղել որպես դիտորդական կառույց, ի՞նչ է, Արցախում տեղի ունեցած ընտրությունները ոչ լեգիտիմ են համարո՞ւմ: Սա բառիս բուն իմաստով ազդակ է Ադրբեջանին: Բայց մենք չպետք է նման «կիքս» թույլ տանք, որից կարող է օգտվել Ադրբեջանը:

Սա միջազգային հանրության մեջ շատ լուրջ քննարկումների առիթ կարող է դառնալ: Ես դրա համար եմ շեշտում, որ տեղի հասարակական կազմակերպությունները պետք է դիմեն կառավարությանը, որ Արցախում դիտորդական առաքելություն իրականացնեն, որովհետև հասնելու ենք վտանգավոր եզրագծի»,-եզրափակեց Աղվան Պողոսյանը:

ԱՆՆԱ ԲԱԴԱԼՅԱՆ