Ֆեյքային պատերազմների «առանձնահատկությունները»

Վերջին շրջանում գնալով շատանում են ֆեյսբուքյան ֆեյք օգտատերերի կողմից այս կամ այն քաղաքական զարգացումների վերաբերյալ կատարվող մեկնաբանությունները։ 

Ընդհանրապես, ֆեյք «ունենալը» նախկինում էլ էր «մոդա», իսկ այժմ պարզապես դարձել է զանգվածային։ «Փաստ» թերթի՝ գաղտնի մնալ ցանկացող աղբյուրի փոխանցմամբ՝ այս հարցը բավականին առանցքային է հատկապես գործող իշխանությունների շրջանում, որոնց ներկայացուցիչները, ընդհանուրի թիմից զատ, առանձին-առանձին ֆեյքերի մի ամբողջ «գվարդիա» ունեն՝ իրենց գրառումները «լայքելու», «շեյրելու», մեկնաբանություններ անելու, ինչպես նաև բացասական նյութերի վրա «հարձակվելու» համար։

Աղբյուրի փոխանցմամբ, որոշ կառույցներ իրենց աշխատակազմերում առանձին հաստիքներ են պահում, ասենք՝«օգնականի» կարգավիճակով, որոնք հիմնականում զբաղվում են «շեֆի» սոցցանցային «կյանքն» ապահովելու և ապահովագրելու, ֆեյքային թիմի աշխատանքները համակարգելու և անհրաժեշտության դեպքում համապատասխան «միջամտություններ» ձեռնարկելու գործով։

Ի դեպ, իշխանական ֆեյքերի մեծ մասն աչքի է ընկնում ընդգծված հայհոյախառն լեզվապաշարով ու սանձարձակ պահվածքով, ինչպես նաև մի յուրահատուկ «բնավորություն» է դրսևորում. միանգամից որպես մեկնաբանություն տեղադրում են այն տարբերակը, որն ասված է «վերևից»՝ առանց ուղղումներ, խմբագրումներ, փոփոխություններ անելու, այսինքն՝ «քոփի - փեստ» սկզբունքով։