Ադրբեջանի յուրաքանչյուր երրորդ բնակիչ պարտք է բանկերին. փորձագետ

Ադրբեջանի բնակչության 38 տոկոսը վարկային պարտավորություններ ունի բանկերի առաջ:

Վկայակոչելով ադրբեջանական ԶԼՄ-ները, facebook-ի իր էջում գրառել է Տնտեսական հետազոտությունների կենտրոնի ղեկավար, ԱՄՆ-ում վտարանդի Գուբադ Իբադօղլուն:

Նրա խոսքով` Ադրբեջանի կենտրոնացված վարկային ռեեստրի տվյալների համաձայն, 2015 թվականի հոկտեմբերի 1-ի դրությամբ Ադրբեջանում բանկերին պարտապանների թիվը կազմում է 2 մլն 505 հազար 515 մարդ, իսկ երաշխավորների թիվը` 1 մլն 184 հազար 2002, ինչը նշանակում է, որ բնակչության 38,5 տոկոսը կամ 3,7 մլն մարդ 44 բանկերի եւ 41 վարկային կազմակերպությունների նկատմամբ պարտքային պարտավորություններ ունի: Ընդ որում, վերջին 5 ամսում պարտապանների թիվը 90 հազարով մեծացել է, իսկ երաշխավորների թիվը` 70 հազար մարդով:

Նույն աղբյուրի այլ տվյալների համաձայն` վարկային տեղեկությունների ընդհանուր թիվը կազմում է 10,4 մլն: Միջին հաշվով մեկ պարտապանը պարտավորություններ ունի 4 բանկերի առաջ, ինչը նշանակում է, որ մի բանկի հետ վերջնահաշվարկ անել չկարողացող քաղաքացիները վարկ են վերցրել այլ բանկում:

Գուբադ Իբադօղլուի կարծիքով` Ադրբեջանում ստեղծված իրավիճակը բանկերի եւ վարկային կազմակերպությունների աշխատանքի ոչ ճիշտ կազմակերպման արդյունք է:

Անդրադառնալով թեմային` «Թուրան»-ը հաղորդում է, որ Ադրբեջանում բազմաթիվ ինքնասպանությունների նոր ալիքի պատճառը հանդիսանում է վարկերի գծով պարտքերը վճարելու քաղաքացիների անընդունակությունը: Գործնականում ամեն շաբաթ Ադրբեջանում գրանցվում է ձեռնարկատերերի եւ շարքային քաղաքացիների ինքնասպանության կամ ինքնասպանության փորձի դեպք, որոնք եկամուտների բացակայության, համատարած կոռուպցիայի եւ ունեցվածքը կորցնելու սպառնալիքների պատճառով չեն կարողանում ելք գտնել ստեղծված պարտքային փոսից:

Գործակալությունը նշում է, որ խնդրահարույց վարկերի կտրուկ աճին շատ բանով օժանդակել է 2015 թվականի փետրվարի վերջին ադրբեջանական ազգային արժույթի` մանաթի 34 տոկոսով արժեզրկումը:

Իրենց հերթին պաշտոնական կառույցները խուսափում են մեկնաբանել  տնտեսագետի արծարծած կարծիքները: Ադրբեջանում տեղեկություններ են տարածվում վերջին ամիսներին բանկերի առաջ տասնյակ միլիոնների հասնող  վարկային պարտավորությունները մարել չկարողացող բազմաթիվ քաղաքացիների ձերբակալության կամ կալանավորկման մասին: Այդ տեղեկությունները չեն մեկբանանում նաեւ Ադրբեջանի իրավապահ մարմինները:

Ադրբեջանական ԶԼՄ-ները հայտնում են, որ ընթացիկ տարվա 9 ամսում 4,5 անգամ աճել է նաեւ ժամանակավրեպ միկրովարկերի ծավալը` 2014 թվականի նույն ժամանակաշրջանի համեմատ, հասնելով 96,86 մլն դոլարի: Ընդհանուր պորտֆելում խնդրահարույց միկրովարկերի բաժինը 2,3 տոկոսից հասել է 9,6 տոկոսի:

«Ազերբայջան» թերթին տված հարցազրույցում Ադրբեջանի արդարադատության նախարար Ֆիքրեթ Մամեդովը հայտնել էր, որ 2015 թվականի հունվար-սեպտեմբեր ամիսներին Ադրբեջանի արդարադատության մարմինները բանկերին պարտքեր ունեցող 4 հազարից ավելի անձանց արգելել են դուրս գալ երկրից:

Նրա խոսքով` դատական որոշումների կատարմանը խոչընդոտելու եւ դրանք կանխամտածված չկատարելու համար վարչական պատասխանատվության է  ենթարկվել 3250 մարդ: «Այդ թվում 1800 հազար մարդ վարչական կարգով ձերբակալվել է, 242 մարդու նկատմամբ քրեական գործեր են հարուցվել: 4 հազարից ավելի պարտապան անձանց երկրից դուրս գալու իրավունքը սահմանափակվել է», -ասել է նա:

Նախարարն ընդգծել է, որ ընթացիկ տարվա 9 ամիսներին դատական գործերով կատարողական վարույթների թիվը գերազանցել է 350 հազարը, ինչը 53 տոկոսով ավելի է, քան 2014 թվականի հաշվետու ժամանակաշրջանում: