Եգիպտոսում սկսվել Է խորհրդարանական ընտրություններում քվեարկության եզրափակիչ օրը

Եգիպտոսում խորհրդարանական ընտրությունները նոյեմբերի 23-ին մտել են ավարտական փուլ: Երկրորդ փուլի շրջանակներում սկսվել Է քվեարկության երկրորդ եւ վերջին օրը, որը տեղի Է ունենում երկրի 13 նահանգներում: Մնացած 14 նահանգներն իրենց ընտրությունն արել են դեռ հոկտեմբերի վերջին: 

Այս օրերին քվեարկում են Կահիրեն, Նեղոսի դելտայի խտաբնակ նահանգները, ինչպես նաեւ Հարավային Սինան ու Հյուսիսային Սինան, որտեղ անվտանգության առումով առավել վտանգավոր Է իրադրությունը՝ այնտեղ ծայրահեղականների ակտիվության եւ բանակի կողմից լայնածավալ հակաահաբեկչական գործողության անցկացման կապակցությամբ:

Խորհրդարանական ընտրությունները Եգիպտոսի՝ 2013 թվականի հեղափոխությունից հետո սկսված անցումային շրջանի ավարտական փուլն են, հեղափոխություն, որը հանգեցեց իշխանությունից իսլամիստերի հեռացմանը եւ զինվորականների վերադարձին: Նրա առաջին փուլերը դարձան նոր Սահմանադրության ընդունումը եւ նախագահական ընտրությունները, որոնք անցկացվեցին անցյալ տարի: 

2014 թվականին ընդունված Սահմանադրության եւ նոր ընտրական օրենքի համաձայն՝ օրենսդիր իշխանությունը կիրականացվի միապալատ խորհրդարանի՝ Ներկայացուցիչների պալատի կողմից՝ հինգ տարի ընտրական ժամկետով: Դրա կազմում կլինեն 596 պատգամավորներ, ինչն աննախադեպ Է երկրի ողջ 150-ամյա խորհրդարանական պատմության ընթացքում: 120-ը կընտրվեն կուսակցական ցուցակներով, 448-ը՝ անկախ թեկնածուներ են, եւս 28-ին կնշանակի նախագահը: Ընտրությունների երկրորդ փուլում վճռվում Է այն 222 տեղերի ճակատագիրը, որոնք վերապահված են անկախ պատգամավորների համար (դրանց հավակնում Է 2 հազար 847 թեկնածու), ինչպես նաեւ կուսակցական ցուցակներով առաջադրված թեկնածուներին հատկացված 60 տեղերի ճակատագիրը:

Խորհրդարանական ընտրությունների արդյունքները պետք Է հայտարարվեն դեկտեմբերի սկզբին: Նոր խորհրդարանը, առանց որի երկիրն արդեն երեք տարի ապրում Է, իր առաջին նիստը պետք Է գումարի մինչեւ 2016 թվականը, հաղորդել Է ՏԱՍՍ-ը: