«Փոքրիկ, բայց նշանակալի իրադարձություն»․ Փաշինյանի զանգով Մարությանը բացել է Կարապի լճի կղզու դռնակը

 

Վարչապետ Նիկոլ Փաշինյանը Կարապի լճի կղզուց «լայվ» է մտել, ինչպես ինքն ասաց՝ փոքրիկ, բայց նշանակալի իրադարձության մասին պատմելու համար։

 

«Քայլում էինք Կարապի լճի շրջակայքում եւ տեսանք, որ լճի հայտնի դարպասը կողպված է, հետո հանդիպեցինք հայտնի երաժիշտ Վահագն Հայրապետյանին, որը և Աննան հավաստեցին, որ կղզին միշտ բաց է եղել սիրահար զույգերի համար։ Զարմանքով արձանագրեցինք, որ փակ է, և ես՝ ոչ այնքան հին երեւանցիս, միանգամից խորհրդակցելով հին երեւանցիների հետ (տիկնոջ եւ Վահագն Հայրապետյանի), որոշեցի դիմել Երեւանի քաղաքապետին, թե ինչու է կղզու դռնակը փակ։ Երեւանի քաղաքապետը շատ արագ ճշտումներ արեց եւ ասաց, որ ինչ-որ հիմնավորումներ կան, որոնք իր կարծիքով՝ այդքան էլ արդարացված չեն, եւ Երեւանի քաղաքապետը մեր միջնորդությամբ որոշում կայացրեց Կարապի լճի կղզու դռնակը բացել, եւ մենք հիմա երկարատեւ ընդմիջումից հետո առաջին այցելուններն ենք Կարապի լճի կղզու»,- պատմեց Փաշինյանը։

 

 

Նիկոլ Փաշինյանը կղզու վրա էր տիկնոջ՝ Աննա Հակոբյանի եւ երաժիշտ Վահագն Հայրապետյանի հետ։

 

Նա անկեղծացավ, թե ահավոր կարոտում է Երեւանը, «որովհետեւ նախորդ՝ ընդդիմադիր հալածյալի կյանքում շատ հաճախ էր Երեւանի փողոցներում լինում, հիմա առիթից առիթ»։

 

Վահագն Հայրապետյանը նկատեց, թե «մարդիկ ուրախանում են, որ ձեզ տեսնում են», ինչին Փաշինյանը կատակով արձագանքեց՝ «բայց ուրախանո՞ւմ են, թե՞ ասում են՝ արա՛, փոխանակ գնաք, գործով զբաղվեք, սաղ օրը փողոցները թրև եք գալիս»։