Հեռուստատեսությունը ոչ թե անկում է ապրում, այլ վերելք չի ապրում. Արտավազդ Եղոյան

1998 թվականին ՄԱԿ-ի Գլխավոր վեհաժողովը նոյեմբերի 21-ը հռչակեց որպես Հեռուստատեսության համաշխարհային օր: Հայկական հեռուստատեսության օրը նույնպես այս ամիս է՝ նոյեմբերի 29-ին:

Հաղորդավար, դերասան, ռեժիսոր, թարգմանիչ Արտավազդ Եղոյանը համաձայն է Past.am-ի այն դիտարկմանը, թե հեռուստատեսությունն այսօր կորցնում է իր լսարանը:

Ըստ նրա՝պատճառն այն է, որ հաղորդումները չեն բավարարում հանրության պահանջները:

«Ծրագրեր են գնում, որոնք ոմանց կարող են գրավել, բայց շատերին վանում են: Դրա համար մարդիկ անցնում են ինտերնետին: Այսօր ինտերնետը բավականին լավ մրցակից է հեռուստատեսությանը: Ինչ վերաբերում է հեռուստատեսությանը, ապա այն ոչ թե անկում է ապրում, այլ վերելք չի ապրում»,-նշեց մեր զրուցակիցը:

Հարցին՝ ի՞նչ թերացումներ ունի այսօրվա հայկական հեռուստատեսությունը, պարոն Եղոյանը պատասխանեց. «Շատ հարցերում պակասում է պրոֆեսիոնալիզմը: Ես այդ «արհեստավարժ» բառը չեմ կարողանում ընդունել, դրա համար «պրոֆեսիոնալիզմ» խոսքը կասեմ: Եթե պրոֆեսիոնալն է ձեռնարկում գործը, ապա ամեն բան լավ կլինի:Սիրտդ խառնում է, երբ տեսնում ես պատահական մարդիկ էսօր-էգուց դառնում են ռեժիսոր, սցենարիստ: Իմ կյանքում շատ է եղել, որ հրավիրել են նկարահանվելու, հետո սցենարը բանի պետք չի եղել և չեմ գնացել: Այսօր եթերում չեմ էլ երևում շատ»:

Արտավազդ Եղոյանն ասաց, որ շատ են հարցազրույցներին անպատրաստ լրագրողները: Լինելով հեռուստատեսության աշխատակից՝ երբեմն չի կարողանում մերժել հարցազրույցի առաջարկները:Հաղորդավարն ընդգծեց՝ բոլոր գործերում պրոֆեսիոնալ է պետք:

«Գործընկերներիս մաղթում եմ հաջողություն»,- իր խոսքը եզրափակեց Արտավազդ Եղոյանը:

Լևոն Փանոսյան