Թոշակները չբարձրացնելու Գագիկ Մինասյանի հիմնավորումը

ԱԺ Ֆինանսավարկային և բյուջետային մշտական հանձնաժողովի նախագահ, ՀՀԿ-ական Գագիկ Մինասյանը չի կիսում Ֆինանսների նախարար Գագիկ Խաչատրյանի և Աշխատանքի և սոցիալական հարցերի նախարար Արտեմ Ասատրյանի այն տեսակետները, որ հաշվի առնելով 2016 թվականի պետական բյուջեի կանխատեսումները` շատ ավելի վատ ենք ապրելու և մեզ սպասվում է ծանր տարի:

Past.am-ի հետ զրույցում պատգամավոր Մինասյանը վստահություն հայտնեց, որ ավելի վատ չենք ապրելու: Անդրադառնալով այն հանգամանքին, որ եկող տարի սպասվում է գնաճ, սակայն թոշակների, նպաստների կամ աշխատավարձերի բարձրացում չի կանխատեսում` իշխող կուսակցության պատգամավորը հստակեցրեց. «Ինչ վերաբերում է աշխատավարձերին, ապա մենք ունենք բնական աճ. անկախ նրանից, թե բյուջեում նախատեսվում է աշխատավարձի բարձրացում, թե ոչ, պետական ծառայողների աշխատավարձերը ֆոնդի հաշվին ամեն տարի 3-4 տոկոսով ավելանում են, գոնե այս տեսանկյունից այդ պնդումը չենք կարող անել: Մենք նախատեսել ենք 4 «գումարած-հանած» 1,5 տոկոս գնաճ, իսկ թոշակներ չեն ավելանում, սակայն պետք է ասեմ, որ տարիների ընթացքում ապահովել է առաջանցիկ աճ կենսաթոշակների բարձրացման չափը գնաճի ցուցանիշի նկատմամբ: Մի քանի տարի առաջ 70-80 մլրդ դրամ միանգամից ներդրեցինք այդ բնագավառում, ինչը մի քանի անգամ գերազանգեց գնաճի տոկոսը»:

Մինասյանը հավելեց նաև, որ կարող էին հակառակն անել, այն է` գնաճին համահունչ ավելացնել թոշակները, սակայն այդ տարի մենք ունեցել ենք նման հնարավորություններ և էապես բարձրացրել թոշակները: «Եթե նայենք ոչ թե եկող տարվա, այլ վերջին երեք-չորս տարիների կտրվածքով, ապա պատկերը կլիներ այսպես. 4 տարիների կուտակային գնաճից էապես մեծ թոշակների աճ ենք ունեցել»,- եզրափակեց պատգամավորը:

Լիլիթ Լալայան