ԱԳՆ կողմից ընտրվել է ոչ թե ասուլիսային, այլ օպերատիվ աշխատանքի աշխատելաոճը. խոսնակը՝ նախարարի կողմից ասուլիս չհրավիրելու մասին

 

Հայաստանի արտաքին գործերի նախարարության կողմից ընտրվել է ոչ թե ասուլիսային, այլ օպերատիվ աշխատանքի աշխատելաոճը: Այս մասին Tert.am-ի գրավոր հարցմանն ի պատասխան ասել է արտգործնախարարի մամուլի խոսնակ Աննա Նաղդալյանը՝ պատասխանելով հարցին, թե ինչո՞ւ վերջին 1 տարվա ընթացում նախարար Զոհրաբ Մնացականյանը հայաստանյան լրատվամիջոցների համար ասուլիս չի տվել: 

Աննա Նաղդալյանը նշել է, որ նշանակումից ի վեր հայաստանյան և միջազգային տարբեր լրատվամիջոցներին Զ. Մնացականյանը տվել է ավելի քան 15 հարցազրույց և հանդես եկել շուրջ 16 ճեպազրույցներով: 

Խոսելով փորձագիտական այն քննարկումների մասին, թե արտաքին ոլորտում ձեռքբերումներ չկան՝ հակառակ դեպքում դրանք տեղ կգտնեին Նիկոլ Փաշինյանի 100 փաստերի թվում, Աննա Նաղդալյանն ասել է, որ 100 փաստերի մեջ տեղ էր գտել արտաքին քաղաքականությանը վերաբերող տեղեկատվություն, «այնուհանդերձ, այս ձևաչափը Հայաստանի ձեռքբերումների համընդգրկուն զեկույց չէ, ուստի բնականաբար, այնտեղ ամբողջովին չէին արտացոլվել արտաքին քաղաքական ոլորտում տեղի ունեցած դրական փոփոխությունները»:

 

 

- Փորձագիտական շրջանակները քննարկում էին, որ ՀՀ վարչապետ Նիկոլ Փաշինյանի կողմից վերջին ամփոփիչ մամուլի ասուլիսի ժամանակ թվարկած 100 փաստերի շարքում գրեթե բացակայում են արտաքին քաղաքական հիմնական ուղղություններին վերաբերող կետեր, ինչը նշանակում է, որ այս բնագավառում ձեռքբերումներ չկան: ԱԳՆ-ի համար վերջին մեկ տարվա ընթացքում ի՞նչ ձեռքբերումներ են գրանցվել:

- Ես այդպես չէի մեկնաբանի: Նախ նշենք, որ 100 փաստերի մեջ տեղ էր գտել նաև արտաքին քաղաքականությանը վերաբերող տեղեկատվություն, այնուհանդերձ, այս ձևաչափը Հայաստանի ձեռքբերումների համընդգրկուն զեկույց չէ, ուստի բնականաբար, այնտեղ ամբողջովին չէին արտացոլվել արտաքին քաղաքական ոլորտում տեղի ունեցած դրական փոփոխությունները: Արտաքին քաղաքականությունը, առավել ևս դիվանագիտությունը շարունակական գործընթաց է, որն առաջին հերթին ուղղված է արտաքին անվտանգության և զարգացման բարենպաստ միջավայրի ձևավորմանը և ամրապնդմանը: Այս տեսակետից այս մեկ տարվա ընթացքում իրականացված արտաքին քաղաքականությունն առավել, քան արդյունավետ էր:

- Ի՞նչ է արել ԱԳՆ-ն վերջին մեկ տարվա ընթացքում գործընկեր պետություններից բարձրաստիճան պաշտոնյաներին Հայաստան այցեր կազմակերպելու առումով: Քանի՞ պաշտոնյա և պատվիրակություն է ժամանել Հայաստան վերջին մեկ տարվա ընթացքում և դրանցից քանի՞սն են կազմակերպվել ԱԳՆ-ի նախաձեռնությամբ կամ հրավերով:

- Այս մեկ տարվա ընթացքում Հայաստան է այցելել 177 օտարերկրյա պատվիրակություն, որոնցից 27-ը պետությունների ղեկավարների և նրանց տեղակալների, 20 այց՝ կառավարությունների ղեկավարների և նրանց տեղակալների, 50 այց՝ պետությունների արտաքին գործերի նախարարների և պետական քարտուղարների, 17-ը՝ միջազգային կազմակերպությունների ղեկավարների մակարդակով, 63-ը՝ այլ բնույթի այցեր։

- Ինչո՞ւ նախարար Մնացականյանը պաշտոնավարման մեկ տարվա ընթացքում հայաստանյան լրատվամիջոցի համար ասուլիս չի տվել:

- ՀՀ ԱԳՆ նախարարն իր նշանակումից ի վեր հայաստանյան և միջազգային տարբեր լրատվամիջոցներին տվել է ավելի քան 15 հարցազրույց և հանդես եկել շուրջ 16 ճեպազրույցներով՝ պատասխանելով լրագրողների՝ իրեն ուղղված բոլոր հարցերին։ 

Հաշվետու ժամանակահատվածում ԱԳՆ մամուլի խոսնակը ԱԳՆ-ում հավատարմագրված հայաստանյան և միջազգային լրատվամիջոցների մասնակցությամբ տվել է 15 ճեպազրույց, ամենօրյա ռեժիմով մեկնաբանել է ՀՀ արտաքին քաղաքականության վերաբերյալ լրատվամիջոցների և հանրության շրջանում հետաքրքրություն ներկայացնող իրադարձությունները և վերջին զարգացումները։ 

ԱԳՆ կողմից ընտրվել է ոչ թե ասուլիսային, այլ նման օպերատիվ աշխատանքի աշխատելաոճը՝ հաշվի առնելով ոլորտի առանձնահատկությունը և ԱԳՆ գործունեության նկատմամբ առկա մշտական, գրեթե ամենօրյա հետաքրքրվածությունը:

- Արդյո՞ք նախարարը նախատեսում է առաջիկայում ասուլիս տալ հայաստանյան լրատվամիջոցների համար: Եթե այո, ապա ե՞րբ:

- ԱԳ նախարարը մշտապես պատրաստ է հայաստանյան և միջազգային լրատվամիջոցների հետ աշխատանքի համար: Երբ նախանշվի ԱԳ նախարարի հերթական հանդիպումը ԶԼՄ-ներկայացուցիչների հետ, մենք դրա մասին, ինչպես և եղել է կարգը մինչ օրս, կհայտնենք։