Տունը քանդվում է՝ քաղաքապետարանը երկար-բարակ ուսումնասիրում է պատճառները. Սարի թաղի բնակիչ (ֆոտո)

 

Սարի թաղի 18 փողոցի 68 տունը այս տարվա հունվարի 23-ից կիսաքանդ վիճակում է։ Տան բնակչուհի Լիլիթ Բաբախանյանը NEWS.am–ի հետ զրույցում պատմեց, որ հունվարի 23-ին առաջին հարկի սյուներից մեկն էր պոկվել, հաջորդ օրը՝ մյուս սյունը, ահազանգել են Արտակարգ իրավիճակների նախարարություն, եկել, նայել են, տարածքում արդեն փոս էր առաջացել։

 

Լիլիթ Բաբախանյանը նշեց, որ ԱԻՆ-ից ֆիքսել են 2 մետր խորությամբ, 1,5 մետր լայնությամբ, 2 երկարություն փոս, դրանից հետո սողանքը շարունակվել է, և այժմ 3 մետր խորությամբ փոս է գոյացել, իսկ 10 օր առաջ սողանքը շարունակվել է դեպի բակի կողմը՝ ընդգրկելով ավելի մեծ տարածքներ։

 

 

«ԱԻՆ–ի աշխատակիցները տան սողանքի ենթարկված հատվածը սահմանազատել են և արգելել են այդ հատվածներ մուտք գործել՝ մինչև պատկան մարմինները որևէ որոշում կայացնեն»,– ասաց նա։

 

Լիլիթ Բաբախանյանը նշեց նաև, որ իրենց հարևանությամբ ևս մեկ միհարկանի տուն կա, որի միջնապատերն են վնասվել։ 

 

«Տանը ապրում ենք 7 հոգով, շատ վախենում ենք, տունը կարող է փլուզվել, շենքի տակ 3 մետր խորությամբ դատարկություն է։ Այժմ ընդհանուր սողանք է սկսվել՝ պայմանավորված գրունտային ջրերով»,– ասաց նա։

 

Լիլիթ Բաբախանյանը նաև նշեց, որ քաղաքապետարանում հանձաժողով է աշխատում, երկար–բարակ ուսումնասիրում են խնդիրը, գրունտային ջրերն է ուսումնասիրում, տարածքը, սողանքի ակտիվացման գործոնները, իսկ թե իրենք դեռ ինչքան են շարունակելու վախով ապրել կիսաքանդ տան մեջ՝ հայտնի չէ։

 

«Աղոթում եմ, որ քաղաքապետարանը ուսումնասիրությունները շուտ վերջացնի, հակառակ դեպքում տունը կարող է վերջնականապես փլուզվել։ Գնալու տեղ չունենք, մեր տունն է, ո՞ւր գնանք»,– ասաց բնակիչը՝ հավելելով, որ իրենց զգուշացրել են, որ թեթև երկրաշարժից անգամ տունը կփլվի, իսկ անձրևները սողանքային գործընթացներն ավելի են արագացնում։