Հանքավանում 3 անձի սպանելու մեջ կասկածվողի հայրը հիվանդանոցում է

Կոտայքի մարզի Հանքավան առողջավայրում նոյեմբերի 16-ին երեք անձի սպանության մեջ կասկածվող Հայրապետ Սեփոյանի հայրը՝ Գագիկ Սեփոյանը գտնվում է «Սուրբ Գրիգոր Լուսավորիչ» բժշկական կենտրոնի Վերակենդանացման բաժանմունքնում:

NEWS.am-ի հետ զրույցում բժշկական կենտրոնի Շտապ օգնության եւ վերակենդանացման բաժանմունքի վարիչ Սամվել Կարապետյանը հայտնեց, որ Գագիկ Սեփոյանի գիտակցությունը տեղն է, ստացված վնասվածքները միջին ծանրության են:

«Կարելի է ասել՝ թեթեւ վնասվածքներ է ստացել, ոտքի վրա է, այժմ հետազոտման փուլում է»,-ասաց Սամվել Կարապետյանը:

Բժշկի խոսքով՝ Գագիկ Սեփոյանը դեմքի փափուկ հյուսվածքների սալջարդ է ստացել, այժմ հետազոտման փուլում է:

Մեր տեղեկություններով՝ Գագիկ Սեփոյանը, որի հետ վիճելու պատճառով վերջինի որդին՝ Հայրապետ Սեփոյանը կրակել է 3 անձի վրա, ԱԺ նախկին պատգամավոր, ԵԿՄ վարչության փոխնախագահ Մխիթար Հարությունյանի քրոջ ամուսինն է: Իսկ Հայրապետ Սեփոյանը Կոտայքի մարզի Մարմարիկի գյուղապետարանի ավագանու անդամ է:

Նշենք, որ ըստ նախնական տեղեկությունների՝ կողմերի վիճաբանության պատճառը եղել է ծառահատումը: Ըստ այդմ, սպանված երիտասարդները` Վարդան ու Վահե Գալստյանները Հայրապետ Սեփոյանի հոր հետ վիճել են այն պատճառով, որ վերջինս կտրել է  նրանց հոր` Հանքավանում գործարար Ֆրունզե Գալստյանի տնկած ծառը: Նախնական տեղեկություններով՝ ի սկզբանե վեճը կտրած ծառի  պատճառով է եղել, որը  ողբերգական հանգուցալուծում է ունեցել:

Ավելի վաղ NEWS.am-ը հայտնել էր, որ Հանքավանի «Տաք ջուր» կոչվող վայրում կրակել են մեքենայի ուղղությամբ, ինչի հետեւանքով երեք տղամարդ է մահացել՝ երկուսը տեղում, մեկը՝ հիվանդանոցի ճանապարհին: Դեպքի առթիվ քրեական գործ է հարուցվել: Քննություն է տարվում՝ հանգամանքները պարզելու համար:

NEWS.am-ին հայտնի  էր  դարձել մահացած երեք անձանց ինքնությունը: Մեկը 27-ամյա երիտասարդ է Արմեն Հովհաննիսյան անունով, մյուսները  եղբայրներն են՝ 25-ամյա Վարդան Գալստյանը եւ 35-ամյա Վահե Գալստյանը: Արմենը Վահեի ու Վարդանի ընկերն էր, ով եղել է մեքենայի մեջ: