Կրտսեր սերժանտ Հենրիկ Ղահրամանյան. զոհվել է 3 վիրավորի թեժ մարտի դաշտից դուրս բերելիս

Մեր ժամանակի հերոս կրտսեր սերժանտ Հենրիկ Ղահրամանյան. Հենրիկ Ղահրամանյանը 2016 թվականի ապրիլի 2-ին ծավալված մարտական գործողությունների ժամանակ հակառակորդի մեծաքանակ վարձկան դիվերսանտների դեմ մարտնչել է մինչեւ վերջին փամփուշտը, ոչնչացրել թշնամու բազմաթիվ գրոհայինների: Այդ կատաղի մարտերից հետո զոհվել է մարտադաշտում:

Արցախում զոհված Հենրիկ Ղահրամանյանը վերջին անգամ ապրիլի 2-ին էր խոսել հոր հետ։ Պատերազմի լուրը ստանալուց հետո ծնողներին զանգել, ասել էր, որ իր համար չանհանգստանան, ամեն ինչ լավ է, դրանից հետո՝ մինչեւ ապրիլի 7-ը նրանից լուր չի եղել։ Ծնողներին ասել են, որ մարտական գործողությունների ժամանակ Հենրիկն արիաբար մարտնչել է, մինչեւ զոհվելը 3 վիրավորի է դուրս բերել, սակայն վիրավոր ընկերներին դուրս բերելիս թշնամին նկատել է նրան ու հակառակորդի կողմից ստացած հրազենային վիրավորումից զոհվել է: 

Հենրիկ Ռուդոլֆի Ղահրամանյանը ծնվել է 1996 թվականի նոյեմբերի 28-ին Ռուսաստանում: 6 տարեկան հասակում ընտանիքի հետ տեղափոխվել է Երեւան: Ապրում էր Մասիս քաղաքում: Սովորել է Մասիսի թիվ 2 դպրոցում, որն ավարտելուց հետո ընդունվել է քոլեջ: 2014 թվականին զորակոչվել է բանակ: Արարատի մարզի Մասիս քաղաքի Վահրամ Բաբայանի անվան թիվ 2 հիմնական դպրոցում, որտեղ սովորել է Արցախում հերոսաբար զոհված Հենրիկը, ստեղծվել է նրան նվիրված փառքի անկյուն, որտեղ վաղ առավոտից դպրոցի աշակերտները հաջորդաբար պատվո պահակ են կանգնում:

Խելացի, բարի, հոգատար, այսպես են բնութագրում հարազատներն ու ուսուցիչները Հենրիկ Ղահրամանյանին: ԼՂՀ նախագահի հրամանագրով Հենրիկ Ղահրամանյանը հետմահու պարգեւատրվել է «Մարտական ծառայություն» մեդալով: