Հայաստանը բանակցում է ավիաընկերությունների հետ ՀՀ-Չինաստան ուղիղ չվերթի գործարկման ուղղությամբ

 Հայ-չինական հարաբերությունները զարգանում են տարբեր ուղղություններով` սկսած ենթակառուցվածքներից մինչև զբոսաշրջություն և ավիացիա:

«Հայ-չինական համագործակցությունը «Մետաքսի Ճանապարհ» տնտեսական գոտու ստեղծման չինական նախաձեռնության լույսի ներքո» թեմայով գիտաժողովին այս մասին ասաց ՀՀ էկոնոմիկայի փոխնախարար Սերգեյ Ավետիսյանը` ներկայացնելով երկու երկրների համագործակցությունը ներկայիս փուլում: «Տարվա ընթացքում մենք բազմաթիվ հանդիպումներ ենք ունեցել Չինաստանի մասնավոր հատվածը ներկայացնող տարբեր ոլորտների գործիչների հետ: Մոտ ապա գայում այդ հանդիպումների արդյունքները տեսանելի կլինեն:  Բանակցություններ ենք վարում ավիաընկերությունների հետ Հայաստան-Չինաստան ուղիղ չվերթի վերականգման ուղղությամբ»,- ասաց փոխնախարարը` չմասնավորելով, թե Չինաստանի դեպի որ քաղաքն է իրականացվելու չվերթը:

 Նա նաև հավելեց, որ զբոսաշրջության ոլորտի զարգացման խթանման նպատակով պայմանագիր է կնքվել երկու երկրների միջև, բացի այդ` Հայաստանն ընդգրկվել է Չինաստանի կողմից հրապարակվող զբոսաշրջության համար անվտանգ երկրների ցանկում:

Անդրադառնալով «Մետաքսի Ճանապարհ» տնտեսական գոտու ստեղծմանը` Սերգեյ Ավետիսյանը համոզմունք հայտնեց, որ Արևմուտքն Արևելքին կապող ճանապարհների խաչմերուկում գտնվող և Եվրասիական տնտեսական միության, Եվրոպական միության, ԱՄՆ-ի ու մի շարք այլ երկրների հետ առևտրի արտոնյալ ռեժիմներ ունեցող Հայաստանը կարող է հետաքրքիր լինել չինական ներդրողների համար:

Հայաստանի և Չինաստանի միջև ուղիղ ավիահաղորդակցության հաստատման մասին հայտարարել էր նաև ՀՀ նախագահ ՍերժՍարգսյանը՝ Չինաստան կատարած պետական այցի ժամանակ ելույթ ունենալով Պեկինի համալսարանում: