Ազգը մեզ կների այս փոքրիկ խախտումը. Լևոն Զուրաբյան

«Ազատություն» ռադիոկայանի կողմից կազմակերպված Facebook-յան ասուլիսի հյուրն այսօր ՀԱԿ խմբակցության ղեկավար Լևոն Զուրաբյանն էր, ում հետ զրույցում Past.am-ը հետաքրքվեց, թե երբ են լինելու ՀԱԿ-ի վարչության ընտրությունները:

Նշել էինք, որ վերջին ընտրությունները կայացել են երկու տարի առաջ, իսկ եթե մինչ այս տարեվերջ ընտրություններ տեղի չունենան, դա կհամարվի ՀԱԿ կանոնադրության խախտում:

Զուրաբյանի պատասխանը ներկայացնում ենք ամբողջությամբ: «Գարնանը, երբ այդ հարցը հասունացավ, փետրվարյան հայտնի դեպքերն էին, այդ ժամանակ իրավիճակն անորոշ էր, մենք որոշում ընդունեցինք հետաձգել Կոնգրեսի համագումարի անցկացումը մինչև աշուն, բայց աշնանը, կներեք, հայ ազգի գլխին ընկավ Սահմանադրական հանրաքվեն: Հիմա ո՞վ ճիշտ կհամարեր, որ մենք, թողած հանրաքվեի քարոզարշավը, զբաղվեինք մեր կուսակցության ներքին կազմակերպական խդիրներով, փորձեինք ժողովներ անցկացնել»:

Երբ հաղորդավարը հարցրեց, թե չեն կազմակերպում, երբ անգամ խախտվում է կուսակցության կանոնադրությունը, Զուրաբյանն ասաց. «Կարծում եմ՝ մեր ազգը մեզ կների այս փոքրիկ խախտումը՝ հասկանալով մի բան, որ այսօր կա հարյուր անգամ ավելի կարևոր գործ դիմակայելու այս սահմադրական արկածախնդրությանը, որը կոչված է հավերժացնել և ցմահ դարձնել Սերժ Սարգսյանի իշխանությունը, կներեք, այս խնդիրը մենք համարում ենք շատ ավելի կարևոր»:

Լիլիթ Լալայան