Անթալիայում Սաուդյան Արաբիայի թագավորին խիստ շքեղ ընդունելություն է ցուցաբերվել

Թուրքիայի Անթալիա քաղաքում նոյեմբերի 15-16-ը կայանալիք G-20 գագաթնաժողովի հյուրերից առաջինը քաղաք է ժամանել Սաուդյան Արաբիայի թագավոր Սալման բին Աբդուլազիզ ալ-Սուուդը, ում խիստ շքեղ ընդունելություն է կազմակերպվել:

Վկայակոչելով թուրքական «Հուրիեթ» պարբերականը, թեպետ հենց օդանավակայանում միապետին երկու ուղղաթիռ է սպասել, սակայն նա Mardan Palace հյուրանոց է գնացել շուրջ 60 մեքենայից բաղկացած ավտոշարասյունով:

Սաուդյան Արաբիայի թագավորի և շուրջ 1000 հոգուց բաղկացած պատվիրակության համար հյուրանոցում պատվիրվել են 546 սենյակ, որոնցում գիշերելն սկսվում է օրական 800 եվրոյից և հասնում մինչև 15 հազար եվրոյի: Նշվում է, որ թագավորական ընտանիքի անդամների համար նախատեսված սենյակների գները սկսվում են 9 հազար եվրոյից: Պատվիրակության անդամների կերակուրները պատրաստելու են համաշխարհային ճանաչում ունեցող ռեստորանները, նրանց համար գործելու է 7 հազար 500 քառակուսի մետր տարածք զբաղեցնող սպա սրահը:

Թագավոր  Սալմանին և նրա որդու՝ արքայազն Թելալին պատկանող իրերը Անթալիա են բերվել մեկ շաբաթ առաջ և հյուրանոց են տեղափոխվել 16 բեռնատարների միջոցով: Միապետի և պատվիրակության անդամների համար  զրահապատ Mercedes մակնիշի 65 ավտոմեքենա է բերվել, իսկ պատվիրակության անդամների օգտագործման համար ընդհանուր առմամբ վարձվել է 400 բարձրակարգ ավտոմեքենա: Քանի որ դրանք բոլորը չեն կարողացել կայանել հյուրանոցի ավտոկայանատեղիում, դրանց մի մասը կանգնեցվել է հյուրանոցի հարակից ճանապարհահատվածներին: