«Այս իրավիճակը բերելու է հասարակության խիստ բևեռացմանը»

Այն, ինչ վերջին մի քանի օրերին կատարվում է սոցիալական ցանցերում, մասնավորապես ֆեյսբուքյան հայաստանյան տիրույթում, երբեմն մարտադաշտ է հիշեցնում: Իհարկե, երևույթը նոր չէ: Բայց այս փուլում ևս հանրությանը հայտնի որոշ անձինք կարծիք հայտնելուց հետո արժանանում են որոշ խմբերի՝ վիրավորանքներով, հայհոյախառն արտահայտություններով լի արձագանքին: Որոշներն էլ նույն բառապաշարով պատասխանում են նշված խմբերին:

 

Քաղաքագետ Աղվան Պողոսյանը, թեմայի շուրջ խոսելով, նշեց.

 

«Նախ՝ մի փոքր պետք է հետ գնամ: Այդ ատելության մթնոլորտի սերմանումը եղել է հեղափոխության թաքնված կողմերից մեկը: Հրապարակից քարոզվում էր սեր և հանդուրժողականություն, բայց, ընդհակառակը, գործող իշխանության ու «հեղափոխական թիմի» գործելաոճը ֆեյսբուքյան տիրույթում ատելության մթնոլորտի սերմանում էր: Այսինքն՝ իրենց կարծիքին հակառակ կարծիքը ենթարկվում էր շատ գռեհիկ հարձակման՝ ֆեյքերի միջոցով: Կար մի ժամանակ, երբ այդ իրավիճակը մի փոքր մարել էր, սանդղակով ավելի ներքև էր, բայց այս պահին մենք զգում ենք, որ կա ակտիվացում»,–մեզ հետ զրույցում ասաց նա՝ օրինակ բերելով Պարգև Սրբազանի, Վիտալի Բալասանյանի, Սեյրան Օհանյանի և այլոց հասցեին հնչող վիրավորանքները, նրանց շուրջ ձևավորված մթնոլորտը:

 

«Մեր հանդեպ ևս կա այդ մթնոլորտը: Ես նախկինում ևս նշել եմ այն մասին, որ երբ իրավիճակը թելադրում է մթնոլորտը, դա վատ սցենարների է բերում: Այս պահին այդ «ֆեյքային թիմն» արդեն ակտիվացել է, իսկ թե ինչու է ակտիվանում, պարզաբանենք հետևյալը. գործող իշխանության, նույն Նիկոլ Փաշինյանի վարկանիշը սրընթաց կերպով անկում է գրանցում, պարզ է նաև այն, որ ժողովուրդը հասկացել է, որ խոստումները չեն իրականացել: Մարդիկ զգում են, որ իրենց սպասումները չեն իրականացել: Վարկանիշի անկման հետ մեկտեղ, իրենք ֆեյքերով փորձում են ճնշել այլակարծությունը: Գործող իշխանության հասցեին յուրաքանչյուր առողջ միտք, առողջ քննադատություն ենթարկվում է հայհոյախառն գրառումներով շատ գռեհիկ հարձակման: Մենք էլ ենք նույնը ստանում, բայց, ինչևիցե, ունենք մի իրավիճակ, երբ պետք է համակերպվենք և աշխատենք ավելի խելացի, մտածող հասարակության լայն շրջանակների հետ»:

 

Նրա խոսքով, այստեղ անելիք ունեն այն մտածող մարդիկ, հայտնի քաղաքական գործիչները, մտավորականները, որոնք մտահոգված են այս իրավիճակով:

 

«Իրենք պետք է հանդես գան զսպման կոչերով: Պետք է սկսեն խոսել, որովհետև այս իրավիճակը բերելու է հասարակության խիստ բևեռացմանը: Իսկ այդ երևույթը շատ անցանկալի սցենար է ենթադրում, մանավանդ, երբ տեսնում ենք, թե Արցախյան հարցն ինչպիսի ակտիվ փուլում է: Բոլորն անելիք ունեն, բոլոր քաղաքական գործիչները, այդ թվում՝ Նիկոլ Փաշինյանը: Ըստ իս՝ առաջինը հենց նա պետք է կոչով հանդես գա, որ հասարակության այդ բաժանումը տեղի չունենա»,–ասաց նա:

 

Դիտարկմանը, թե հասարակության բևեռացումն իրատեսակա՞ն է այն պարագայում, երբ, ըստ մասնագետների, ֆեյսբուքն, այնուամենայնիվ, չի արտացոլում իրական տրամադրությունները, նա արձագանքեց.

 

«Ես հակված չեմ նրան, որ ֆեյսբուքյան տիրույթն արտահայտում է մեր հասարակության տրամադրվածությունը: Բայց շատ վտանգավոր երևույթ է, երբ այսպիսի բաժանումներ են լինում: Ես նորից եմ շեշտում՝ մենք ունենք Արցախյան հիմնահարց, խաղաղության կոչեր են քարոզվում, ու դրան զուգահեռ տեղի է ունենում հասարակության բևեռացում: Ես չեմ ուզում մեր ժողովրդին թերագնահատել, չեմ կարծում, որ ֆեյսբուքն այդպիսի լայն ազդեցություն կարող է թողնել հասարակության տրամադրվածության, դիրքորոշման վրա: Այդուհանդերձ, իհարկե, այն շատ երկրներում հզոր գործիք է համարվում: Նաև մեզ մոտ է այն հզոր գործիք՝ հեղափոխությունն իրականացվել է նաև Ֆեյսբուք սոցիալական ցանցի միջոցով»:

 

Շարունակելով՝ Ա. Պողոսյանն ընդգծեց, որ ինչ–որ կերպ պետք է կանխել առկա մթնոլորտի խորացումը:

 

«Դրա համար բոլորը պետք է սկսեն հանդես գալ կոչերով: Բայց այս վերջին ժամանակահատվածում կեղծ իրավապաշտպանները, լրագրողական կառույցները ձայն չեն հանում: Ըստ էության՝ չկան: Այսօր մի քանիսն ու մի քանի կառույցներ կան, որոնք ինչ–որ խնդիրների շուրջ արձագանքում են: Եթե մենք Արցախի հերոսներին, պատերազմ հաղթած գեներալներին ենք վարկաբեկում, դրա հիմնական նպատակը ո՞րն է: Ես չեմ դիտարկում սա այն տեսանկյունից, որ դրանք այս փուլում տեղի են ունենում ինչ–որ անձնական շահերի համատեքստում: Սա ընդամենը հասարակությանը բաժանելու, բևեռացնելու ծրագրավորված գործընթաց է»,– եզրափակեց նա:

 

ԱՆՆԱ ԲԱԴԱԼՅԱՆ