Հակառակորդի կրակոցներից զոհված 20-ամյա Վահեն օրեր առաջ ծառայակցի կյանքն էր փրկել

News.am-ը գրում է.

ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կրակոցից նոյեմբերի 12-ին զոհված ժամկետային զինծառայող Վահե Վանոյանը Շիրակի մարզի Արեւիկ գյուղից էր, մեկ ամսից պետք է զորացրվեր:

Արեւիկի գյուղապետ Գարեգին Ստեփանյանը NEWS.am-ին պատմեց, որ մեկ ամիս առաջ ծառայակցի կյանքը փրկելու համար Վահեին մեդալով էին պարգեւատրել, 10-օրյա արձակուրդ տվել, բայց նա նախընտրել էր արձակուրդ չգալ՝ մտածելով, որ մեկ ամսից զորացրվելու է:

«Եթե արձակուրդ եկած լիներ, վաղը նոր լրանում էր օրը, կգնար հետ, բայց ասել էր՝ մեկ ամիս ա մնացել, գամ, ի՞նչ անեմ»,- ասաց գյուղապետը՝ նշելով, որ Վահեն ընտանիքի հետ դեպքից 1 ժամ առաջ էր խոսել. «Խոսել էր մամայի հետ, ասել էր՝ լավ եմ, շուտով կգամ: Դրանից մի ժամ հետո դեպքը եղել էր»:

Վահեն Վանոյանների կրտսեր զավակն էր, ավագ քույր ունի։

Ավելի վաղ NEWS.am-ը հայտնել էր, որ նոյեմբերի 12-ին` ժամը 21:00-ի սահմանում, ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից արձակված կրակոցներից մահացու հրազենային վիրավորում են ստացել զինծառայողներ Վահե Վարդգեսի Վանոյանը (ծնվ. 1995թ.) եւ Միքայել Առաքելի Թորոսյանը (ծնվ. 1996թ.):

Դեպքի մանրամասները պարզելու համար կատարվում է քննություն:

Լուսանկարները՝ Վահե Վանոյանի odnoklassniki-ի էջից