Կարող են զանգահարել արտերկրից ու խնդրել բանկային քարտի տվյալներ. ովքե՞ր են խաբեության նոր ձևի թիրախները

Past.am

Բանկային քարտերի տվյալներ տրամադրելու հարցում քաղաքացիները պետք է զգուշանան: Սա «Իրազեկ և պաշտպանված սպառող» ՀԿ նախագահ Բաբկեն Պիպոյանը զգուշացնում է քաղաքացիներին:

«Շատ քաղացիներ տեղյակ չեն, որ եթե իրենք ամբողջությամբ տրամադրում են քարտային տվյալներ՝ քարտը, և ոչ թե բանկային հաշվի համարը, ապա քարտերի հետ աշխատել իմացողները տարբեր կերպով կարող են բանկային քարտից գումար վերցնել: Եվ հատկապես դրսից կարող են լինել զանգեր: Խոցելի խմբերը հիմնականում այն մադրիկ են, ովքեր համացանցով կամ ինչ-որ կերպով հայտարարություն են տարածում մեքենայի, բնակարանի կամ ինչ-որ այլ ապրանք  վաճառելու մասին: Մարդիկ զանգահարում են արտերկրից, օրինակ՝ Ռուսաստանից, ասում, որ ուզում են ձեռք բերել այդ ապրանքը կամ ցանկանում են օգնել: Դրա դիմաց խնդրում են տրամադրել բանկային քարտի տվյալները, տպավորություն թողնելու, թե իբրև շատ օպերատիվ ուզում են գումարը հասցնել, որ վաճառքն արագ լինի: Եվ մարդիկ միամտաբար նկարում են բանկային քարտը և ուղարկում համապատասխան դիմողին: Մեր հորդորն այն է, որ խուսափեն անձնական տվյալներ՝ հատկապես քարտային տվյաներ տրամադրելուց, և բոլոր նման դեպքերում տրամադրեն ոչ թե բանկային քարտի, այլ պարզապես բանկային հաշվեհամարի տվյալները»,-Past.am-ի հետ զրույցում ասած Բ. Պիպոյանը:

Վերջինս չբացառեց, որ նույն տրամաբանությամբ նաև այստեղից էլ կարող են լինել զանգերը: Նշենք, որ Բաբկեն Պիպոյանի հետ զրույցից հետո նկատեցինք, որ սոցիալական ցանցերում այս վտանգի մասին բարձրաձայնել են նաև մի շարք օգտատերեր ու հաշվի առնելով իրենց շրջապատում գրանցված դեպքերը՝ քաղաքացիներին զգուշացրել են խաբեության զոհ դառնալու վտանգի մասին:

Բաբկեն Պիպոյանից հետաքրքրվեցինք նաև օնլայն խանութների և գործարքների մասին, որոնց ժամանակ ևս որոշ տվյալներ պետք է փոխանցել:

Մեր զրուցակիցն այս առումով խորհուրդ տվեց հետևյալը. «Մեր հորդորն է այստեղ հետևողական լինել և նայել, հասկանալ կայքի պատմությունը, նախապատմությունը, հաշվի առնել մարդկանց վերաբերմունքը, ռեալ գնորդների կարծիքները, և հետո նոր կատարել համապատասխան գնումը»:

Աննա Բադալյան