Խաղաղություն մեր երկրին, բարեկեցություն մեր ժողովրդին, իմաստնություն՝ որոշում կայացնողներին. կհանդիպենք հունվարի 10–ին

ՀԱՍԱՐԱԿՈՒԹՅՈՒՆ 27 Դեկտեմբեր, 2018 7:03

Ընդամենը մի քանի օրից կզրնգան բաժակները, բոլորս կլինենք բարի–բարի, ժպտուն–ժպտուն: Մի խոսքով, բոլորս լավը կլինենք: Որովհետև Ամանոր է, որովհետև գրեթե բոլորի սիրելի տոնն է: Այնպես լիներ, որ միայն Ամանորի տոներին այսպես բարի ու ժպտուն, հանդուրժող ու սիրող չլինեինք: Մի խոսքով՝ միայն Ամանորին չէ, որ լավը լինեինք: Սա համարենք ոչ միայն ցանկություն, այլև մաղթանք, այլև կոչ՝ բոլորս բոլորին, ամենքս մեզ: Չասենք, որ կյանքն իր սրբագրումներն է անում, որ կյանքի դժվարություններն ու հոգսերը խանգարում են մեր երազանքների ու մաղթանքների կյանքի կոչմանը: Այսպես, թե անպես, դա գիտենք բոլորս: Ուղղակի փորձենք ապրել այնպես, որ տարվա ամեն մի օրը նման լինի Ամանորի մեր տրամադրությանը:

Ամանորը յուրաքանչյուրիս համար նաև մի փոքր հետ նայելու, անցած ևս մեկ տարին ամփոփելու, լավն ու վատը, կորուստներն ու ձեռքբերումները կշեռքի նժարին դնելու հնարավորություն է: Ահա պատմություն է դառնում ևս մեկ տարի՝ 2018 թվականը: Եթե մեկ բառով ամփոփելու լինենք, ապա այն բուռն տարի էր՝ բոլոր առումներով, ի սկզբանե: Արդյունքների մասին հարկ կլինի խոսել գուցե տարիներ անց: Հիմա ուղղակի արձանագրենք՝ ինչ ունեցանք, ինչ տարի, ինչ օրեր, ինչ ժամեր ապրեցինք... Արձանագրենք որպես կայացած փաստ ու ընդամենը ցանկանանք, որ երբեք, ոչ մի պարագայում, ոչ մի վայրկյան չափսոսանք մեր ապրած կյանքի, մեր անցած օրերի, մեր քայլերի համար: Պարզապես չափսոսանք ու վերջ:

Մենք էլ մեր ընթերցողների հետ փորձեցինք մեր առաքելությունը կատարել՝ առաջին հերթին ձգտելով բացարձակ ազնվության: Ազնվության մեր ընթերցողների առջև, բայց առաջին հերթին՝ մեր խղճի, մեր համոզմունքների, մեր արժանապատվության առջև: Որքանով ստացվեց 2018–ին, դատեք ինքներդ: Շնորհակալ ենք մեր ընթերցողներին, մեր բոլոր գործընկերներին, շնորհակալ ենք բոլոր մասնագետներին, փորձագետներին, գործիչներին, որոնց օգնությամբ փորձեցինք վերլուծել, հասկանալ, ընկալել ու արձանագրել: Շնորհավոր բոլորիս Ամանորն ու Սուրբ ծնունդը: Բոլորիս մշտամնա հոգեկան անդորր, ջերմություն, սեր, բարություն ու հանդուրժողականություն: Խաղաղություն մեր երկրին, բարեկեցություն մեր ժողովրդին, իմաստնություն՝ որոշում կայացնողներին:

Կհանդիպենք: Կհանդիպենք արդեն 2019 թվականին: Մեր հաջորդ համարը կլինի հունվարի 10–ին:

«Փաստ» օրաթերթի խմբագրակազմ