Հաագայի եկեղեցում ապրող հայ ընտանիքը կարտաքսվի

Թամրազյանների ընտանիքը, որը փորձելով խուսափել արտաքսումից՝ հոկտեմբերից ի վեր ապրում է Հաագայի եկեղեցում, չի ստանա կացության իրավունք, հայտնում է Nu.nl-ն։ 

Բեթհել եկեղեցու խոսնակը պատմել է, որ արդարադատության նախարար Մարկ Հարբերսը ընտանիքի հետ զրույցում ասել է, որ չի օգտագործի իր հայեցողությամբ բնակության թույլտվություն շնորհելու լիազորությունը։

Եկեղեցում պատմել են, որ շարունակելու են շուրջօրյա եկեղեցական ծառայություններ մատուցել, ուստի ոստիկանությունը չի կարող մուտք գործել եւ տանել ընտանիքին։ 650 կամավորներ են ներգրավվել եկեղեցու շուրջօրյա սպասարկումն իրականացնելու համար։ Բազմաթիվ լրատվական կազմակերպություններ, որոնց թվում՝ CNN-ը, the New York Times-ը եւ Time magazine-ը, հետեւում են ընտանիքի խնդրի շուրջ զարգացումներին։

Թամրազյանների ընտանիքը՝ մայրը, հայրը եւ երեք երեխաները, Նիդերլանդներում են արդեն 9 տարի եւ մինչեւ եկեղեցի տեղափոխվելը ապրել են Կաթվեյքի փախստականների կենտրոնում։

Ավագ դուստրը՝ Հայարփին սովորում է Թիլբուրգի համալսարանում, էկոնոմետրիկա է ուսանում։ Նա սեպտեմբերին իր թվիթերյան էջում հայտնել էր, որ իր ընտանիքը փախստականի կարգավիճակ է ստացել երեք առանձին դատական լսումներից հետո, սակայն պետությունը ամեն անգամ բողոքարկել է:

Նրանք, ի վերջո, երեք տարի առաջ մերժում են ստացել։ Այս դեպքը հատկապես դժվար դրության մեջ է դրել կոալիցիոն կառավարությանը, քանի որ Հայարփին ChristenUnie-ի ակտիվ անդամ է, որը մինչեւ կոալիցիա կազմելը պայքարում էր մանկական համաներման կարգում փոփոխություններ կատարելու համար։