Կեղծ օրակարգերը այլևս չեն սպառվում. «Փաստ»

«Փաստ» օրաթերթը գրում է.

Հայաստանի քաղաքական–տեղեկատվական դաշտում միշտ էլ եղել են, այսպես կոչված, կեղծ օրակարգեր, որոնք իրացվել են քաղաքական կյանքի տարբեր սուբյեկտների կողմից՝ իշխանությունից մինչև ընդդիմություն: Կեղծ ասելով՝ նկատի ունենք այն օրակարգերը, որոնք որևէ հանրային պատվեր չունեն, բայց այս կամ այն նպատակից ելնելով՝ մատուցվում են որպես հենց հանրային կարևորության խնդիր: 

Հիմա, սակայն, երբ հեղափոխությունը քաղաքականություն է վերադարձրել իր հիմնական շահառուին՝ հասարակությանը, իսկ հեղափոխական իշխանությունն էլ խոստացել է սպասարկել այդ շահառուին, փոխվում է նաև տեղեկատվական դաշտում տիրող մթնոլորտը: Այսօր էլ կան սուբյեկտներ, որոնք իբրև թե հանրային կարևորության խնդիրների դրոշակի ներքո փորձում են իրացնել այս կամ այն նեղխմբային, ստվերային շահեր: Սակայն մեծ հաշվով դրանք բախվում են անտարբերության պատին, չեն դառնում հանրային քննարկման առարկա, կամ առավելագույնը մնում են ֆեյսբուքյան լոկալ տիրույթում:

Պատճառն, ինչպես արդեն նշեցինք, հեղափոխության բերած մեթոդաբանական փոփոխությունն է քաղաքական դաշտում, որն էլ իր հերթին փոխել է նաև տեղեկատվական դաշտի տրամաբանությունը: Այժմ արդեն հասարակությունը՝ վերադառնալով քաղաքականության շահառուի դիրքեր, ունի շատ կոնկրետ սպասելիքներ, ընդ որում, շատ կոնկրետ ուժից՝ իշխանությունից: Հարակից այլ օրակարգերն այս պահին հասարակությանը չեն հուզում ու չեն դառնում նրա համար հետաքրքիր: Սա, իհարկե, չի նշանակում, թե հասարակություն–իշխանություն կապը սրբազան է, ու այլ ուժեր չունեն իրավունք իրացնելու օրակարգեր: Բնավ ոչ: Բայց հասարակությունն, ի դեմս իշխանության, այս պահին հաղորդակցվում է հեղափոխական սպասելիքների, ապագայի մասին լավատեսական սպասումների հետ: Ու այն բոլոր օրակարգերը, որոնք դուրս են մնում այս տրամաբանությունից, դատապարտված են մնալ մարգինալ: Հենց սա է պատճառը, որ նախորդ համակարգից ժառանգված միջկուսակցական ինտրիգների, հակադրությունների առերևույթ հետաքրքիր թվացող ու դրամատիկ դրսևորումները որևէ կերպ չեն դառնում հասարակական լայն սպառման առարկա: