Հայոց ցեղասպանության նվիրված գրքերի շնորհանդես է տեղի ունեցել Լիբանանում

Նոյեմբերի 9-ին Մեծի Տանն Կիլիկիո կաթողիկոսությունում Արամ Ա-ի նախագահությամբ տեղի է ունեցել Հայոց  ցեղասպանության 100-րդ տարելիցի առթիվ կաթողիկոսության կողմից հրատարակված երեք գրքերի շնորհանդեսը:

Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, շնորհահանդեսի բացումը կատարել է կաթողիկոսության միջեկեղեցական բաժանմունքի վարիչ գերպ. Հուսիկ Ծ. վրդ. Մարտիրոսյանը։

Դոկտոր Նորա Բայրակդարյանը ներկայացրել է “The International Criminal Law Review”-ի Հայոց ցեղասպանությանը նվիրված  հատուկ թողարկումը՝ “Legal Avenues for Armenian Genocide Reparations”: Նա անդրադարձել է Սիսի պատմական նստավայրին առնչվող դատակն գործընթացին:

 

Հայտնի պատմաբան Սալեհ Զահրեդդինը ներկայացրել է իր հեղինակած «Հայոց ցեղասպանությանը նվիրված լիբանանյան վկայությունները» հատորը: Այնուհետև դոկտոր Սեդա Դադոյանը ներկայացրել է իր կողմից խմբագրած՝ Մեծի Տանն Կիլիկիո կաթողիկոսության վերջին հազար տարիների պատմությունը “The Armenian Catholicosate of Cilicia: History, Treasures, Mission” հատորը: Իր խոսքում նա ընդգծել է Մեծի Տանն Կիլիկիո Կաթողիկոսության առանցքային դերակատարությունը կիլիկյան շրջանում և, հատկապես, ցեղասպանությանը ենթարկված հայ ժողովրդի վերականգնողական գործընթացներում:

Միջոցառմանը ներկա են եղել Մեծի Տանն Կիլիկիո կաթողիկոս Արամ Ա-ն, կրոնական առաջնորդներ, նախարարներ,պատգամավորներ, Լիբանանում ՀՀ դեսպան Աշոտ Քոչարյանը, Լիբանանի Հայոց ցեղասպանության 100-ամյակիկենտրոնական մարմնի անդամներ, քաղաքական կուսակցությունների ներկայացուցիչներ: