Չունեմ այն ենթադրությունը, որ ցանկանում են անձի գլխին սարքել. Մանվել Գրիգորյանի պաշտպան

Երևանի ընդհանուր իրավասության դատարանը Մանվել Գրիգորյանին գրավի դիմաց ազատ արձակելու միջնորդությունը մերժել է վերացական դատողություններով, առանց որևէ հիմնավոր փաստարկի։ Այս մասին այսօր՝ հոկտեմբերի 17–ին լրագրողների հետ հանդիպմանն ասաց Գրիգորյանի պաշտպան Լեւոն Բաղդասարյանը: Ըստ փաստաբանի՝ Մանվել Գրիգորյանի կողմից ապրիլյան պատերազմի օրերին ուղարկված օգնությունը յուրացնելու մեղադրանքը հնարովի է և մտացածին.

«Նա այդ արարքը չի կատարել, և լիահույս եմ, ու շուտով նախաքննությունը դրա գնահատականը կտա»,–նշեց նա՝ հավելելով, որ Մանվել Գրիգորյանն առանչություն չունի  իրեն պատկանող տարածքում հայտնաբերված զինվորների համար նախատեսված ծանրոցների հետ։

«Ես որպես պաշտպանական կողմ ամենայն պատասխանատվությամբ փաստում եմ՝ այդ արարքը զազրելի արարք է, իմ պաշտպանյալն այն չի կատարել»,–ասաց նա։

Նրա խոսքով՝ վայրը, որտեղից հայտնաբերել են զինվորների համար նախատեսված սնունդը, եղել է ԵԿՄ պահեստը:

«Այնտեղ եղել է ոչ միայն այդ սնունդը, այլև` բազմաթիվ տասնյակներով մեքենաներ, ԵԿՄ մեքենաներ: Այնտեղ այլ կառույցներին պատկանող գույք էլ է եղել: Այո, սեփականության իրավունքով տարածքը պատակնել է իմ պաշտպանյալին, բայց այստեղ եղել են տարբեր կազմակերպություններ»,- ասաց նա:

Փաստաբանը նշեց, որ թեև կալանքի հետ կապված իրենք դժգոհություններ ունեն, սակայն նախաքննության օբյեկտիվության հետ կապված կասկածներ չունեն ։

«Չունեմ այն ենթադրությունը, որ ցանկանում են անձի գլխին սարքել և այլն»,–ասաց նա։

Բաղդասարյանի խոսքով, եթե պարզվի, որ պետական լիազոր մարմիններն ինչ–ինչ պատճառներով իրականությանը չհամապատասխանող տեղեկություններ են փոխանցում Նիկոլ Փաշինյանին, նշանակում է մեր երկրում արդարադատությունն այդ դրվագով կաղում է։

«Պաշտոնապես հայտարարում եմ, պարո՛ն վարչապետ, Ձեզ ճիշտ չեն իրազեկում, դուք  այս դրվագով չեք տիրապետում իրավիճակին, հանձնարարե՛ք կոմպետենտ անձի,  որպեսզի վերջինս ստուգի և Ձեզ զեկուցի արդյոք կան հիմքեր, որպեսզի Մանվել Գրիգորյանը շարունակի կալանքը կրել, եթե նման հիմքեր կան, ուրեմն ես որպես փաստաբան ստախոս եմ։ Եթե նման հիմքեր չկան, նշանակում է Մանվել Գրիգորյանի նկատմամբ տեղի է ունենում դասական խոշտանգում, նա գտնվում է պատանդի կարգավիճակում»,–ասաց նա։

Հիշեցնենք, որ հոկտեմբերի 15–ին Երեւանի ընդհանուր իրավասության դատարանի դատավոր Մարինե Մելքոնյանը բավարարել է նախաքննական մարմնի միջնորդությունն ու երկարաձգել Մանվել Գրիգորյանին կալանքի տակ պահելու ժամկետը։

Հիշեցնենք, որ Մանվել Գրիգորյանը կալանավորվել է հունիսի 19-ին`Երեւանի ընդհանուր իրավասության դատարանի դատավոր Մարինե Մելքոնյանի որոշմամբ: Գրիգորյանին մեղադրանք է առաջադրվել ապօրինի կերպով ռազմամթերք ձեռք բերելու եւ նրա կնոջ` Նազիկ Ամիրյանի, դստեր` Այծեմնիկ Գրիգորյանի, Էջմիածին քաղաքի բնակիչներ Սեյրան Ազարյանի, Արմեն Հակոբյանի եւ այլ անձանց հետ նախնական համաձայնությամբ իրեն պատկանող առանձնատներում պահելու համար, ինչպես նաեւ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Խոսքը վերաբերում է ապրիլյան պատերազմի օրերին ուղարկված օգնությունը յուրացնելուն: