Շիրակի մարզի համայնքները սեփական եկամուտների հավաքագրումը կատարել են 80 տոկոսով

Past.am

Շիրակի մարզի համայնքները, հոկտեմբերի 1-ի դրությամբ, սեփական եկամուտների հավաքագրումը կատարելեն ծրագրվածի 80.3% չափով: Այս մասին Շիրակի մարզի խորհրդի հոկտեմբերի 10-ին տեղի ունեցած նիստի ժամանակ տեղեկացրեց մարզպետարանի ֆինանսական և սոցիալ-տնտեսական զարգացման վարչության պետ Լիպարիտ Մարտիրոսյանը:

Նախկին վարչական տարածաշրջաններից ամենացածր ցուցանիշը գրանցվել է Աշոցքի տարածաշրջանում` 63.1%: Անդրադառնալով խնդրին՝ Շիրակի մարզպետ Կարեն Սարուխանյանը նշեց, որ այդ առումով մի շարք համայնքների ցուցանիշները բավական մտահոգող են, «Խոսքն այն 23 համայնքների մասին է, որոնք մարզի միջին ցուցանիշից էլ ցածր գումարներ են հավաքագրել»,- ընդգծեց մարզպետը: Գյումրի քաղաքը սեփական եկամուտները կատարել է 85.5%, Արթիկ քաղաքը` 87.3%-ով:

Մարզի համայնքներում բերքահավաքի և գյուղատնտեսական ընթացիկ աշխատանքների մասին օրակարգային երկրորդ հարցի զեկուցողը գյուղատնտեսության և բնապահպանության վարչության պետ Մովսես Մանուկյանն էր: Չնայած նախորդ տարվա համեմատ մարզում ավելի քիչ ցանքատարածություններ են մշակվել, սակայն տարին բերքառատ է. արտադրվել է 114 հազար տոննա հացահատիկ: Առավել մտահոգողը կարկտահարություններից մարզի կրած վնասն է` 22 համայնքներում 5100 հա ցանքատարածքների վնասի չափը կազմել է 3 մլրդ դրամ:

Վնասի գնահատման ամբողջական փաթեթներն ուղարկվել են ՀՀ գյուղատնտեսության նախարարություն: Մարզխորհրդի օրակարգային հաջորդ հարցը բյուջեի միջոցներով մարզում առաջնահերթ լուծում պահանջող խնդիրների կատարման ընթացքի վերաբերյալ էր: Քաղաքաշինության վարչության պետ Ալբերտ Մարգարյանը տեղեկացրեց, որ ծրագիր են ընդգրկվել 17 օբյեկտների շինարարական աշխատանքներ, 2 սուբվենցիոն ծրագրեր և 3 բնակարանի գնման վկայագրերի տրամադրման հարց: Հետագայում այս ծրագրում ընդգրկվել են նաև առկա նախագծա-նախահաշվային փաստաթղթեր ունեցող երկու` Հոռոմ-Հովտաշեն և Ջաջուռ-Մեծ Սարիար ճանապարհահատվածների շինարարական աշխատանքներ:

Արմենուհի Մխոյան