Քաղաքապետի պաշտոնակատարի և թեկնածուի ունեցվածքը. «Փաստ»

«Փաստ» օրաթերթը գրում է.

Էջմիածին համայնքի ղեկավարի ժամանակավոր պաշտոնակատար, քաղաքապետի թեկնածու Դիանա Գասպարյանը քաղաքապետի ժ/պ պաշտոնը ստանձնելու օրվա դրությամբ 100 000 ՀՀ դրամ է հայտարարագրել: Այս մասին տեղեկանում ենք նրա՝ Բարձրաստիճան պաշտոնատար անձանց էթիկայի հանձնաժողովի կայքում հրապարակված 2018 թ. պաշտոնը ստանձնելու հայտարարագրից:

Դիանա Գասպարյանը անշարժ և շարժական գույք չի հայտարարագրել: 2018թ. հունվարի 1–ից մինչև պաշտոնական պարտականությունները ստանձնելու օրը ստացված եկամուտների հանրագումարը կազմել է 1 695 517 ՀՀ դրամ: Նա այդ եկամուտը ստացել է երկու տարբեր աշխատավարձերից, որոնք կազմել են 1 655 517 և 40 000 ՀՀ դրամ:

Նշենք, որ Դիանա Գասպարյանը Էջմածնի ղեկավարի պաշտոնակատար էր նշանակվել հունիսի 22–ին: Նշանակմանը նախորդել էր Կարեն Գրիգորյանի հրաժարականը, որին էլ նախորդ էլ էին Կարեն Գրիգորյանի հոր՝ Մանվել Գրիգորյանի և Գրիգորյանների ընտանիքի հետ կապված ԱԱԾ բացահայտումները: Հրաժարականից հետո առանձնապես խոշոր չափերով յուրացումներ կատարելու համար Կարեն Գրիգորյանի նկատմամբ ևս քրեական գործ հարուցվեց:Հավելենք նաև, որ Էջմիածին քաղաքում հոկտեմբերի 21–ին արտահերթ ընտրություններ են նշանակված, որտեղ իր թեկնածությունն է առաջադրել նաև «Քաղաքացիական պայմանագիր» կուսակցության անդամ Դիանա Գասպարյանը: