Գուժ Մանուկյան. «Թող ես հազար անգամ սխալվեմ, բայց այդ հարցում մի քիչ մտահոգություններ ունեմ». «Փաստ»

«Փաստ» օրաթերթը գրում է.

Գնահատելով հեղափոխությունից հետո առկա ձեռքբերումները, խնդիրները, անդրադառնալով նաև սպասվելիք արտահերթ խորհրդարանական ընտրությունների շուրջ ծավալվող հնարավոր գործընթացներին` Հայաստանի ժողովրդական արտիստ Գուժ Մանուկյանը «Փաստի»–ի հետ զրույցում համոզմունք հայտնեց, որ որևէ մեկն այսօր չի կարող իրավիճակը փակուղի տանել:

Դերասանն այդ համատեքստում կարևորեց հինգ ամիս առաջ տեղի ունեցած իրադարձությունները՝ ընդգծելով հատկապես ժողովրդի դերը: «Այսօր էլ շարժումն այնքան համաժողովրդական բնույթ է կրում, որ դժվար թե մի փոքր խումբ կկարողանա ինչ–որ գործընթացներ դեպի փակուղի տանել: Ես չեմ կարծում, որ դա հնարավոր կլինի, որովհետև ժողովուրդն այլ կերպ է մտածում. ոգևորությունը բավականին մեծ է, ինչը թույլ չի տա, որ ինչ–որ անհատներ կարողանան խոչընդոտել այս շարժումը: Դա լինի ընտրություն կամ մեկ այլ գործընթաց, կարևոր չէ»,–ասաց անվանի դերասանը:Այդուհանդերձ, Գուժ Մանուկյանը շեշտեց, որ մեկն է այն մարդկանցից, ով այսօր տեղի ունեցող մի շարք երևույթների հետ համաձայն չէ:

«Ես կասեմ մի բան՝ ամեն մարդ պետք է իր գործով զբաղվի: Եթե ես արվեստի մեջ եմ, եթե ես դերասան եմ, ես պետք է զբաղվեմ միմիայն դերասանական աշխատանքով: Եթե ես ուրիշ տեղեր քիթս մտցնեմ, դա արդեն ճիշտ չի լինի: Բայց այսօր ես նման երևույթներ եմ նկատում և իրողությունների հետ, մեղմ մասած, համամիտ չեմ: Ամեն մարդ պետք է իր գործն անի: Ես կխոնարհվեմ փողոցները մաքրող մարդու առաջ, եթե իմանամ, որ նա այդ գործն անում է այնքան նվիրված, այնքան լիաթոք... Այսպես ասեմ՝ յուրաքանչյուր մարդ պետք է իր գործով զբաղվի՝ «վերևից» մինչև «ներքև»: Բայց այսօր կան մարդիկ, ովքեր, չգիտեմ՝ ինչ–ինչ նկատառումներով, ուզում են քիթ խոթել այնտեղ, որտեղ չպետք է լինեն: Ես դա չեմ կարող ընդունել»,–ասաց Գուժ Մանուկյանը: 

Վերջինս կադրային քաղաքականության խնդիրն առանձնացրեց: «Ամեն մարդ կոչված է ինչ–որ բան անելու: Չի կարելի մի մարդու բերել ու մտցնել մի ինչ–որ տեղ, մի ասպարեզ, որի հետ ինքն ընդհանրապես կապ չունի: Եթե դա արվում է ինչ–ինչ հանգամանքներով պայմանավորված, դա ևս չեմ ընդունում: Չէ ո՞ր այդ մարդն ավելի պետքական կլինի իր ասպարեզին, քան որ բերեն և, կոպիտ ասած, ախպեր–ախպեր, ընգեր–ընգեր սկզբունքով փաթաթեն ժողովրդի վզին: Կադրային քաղաքականությունը շատ կարևոր է և պետք է հետամուտ լինել: Թող ես հազար անգամ սխալվեմ, բայց այդ հարցում մի քիչ մտահոգություններ ունեմ»,–ընդգծեց մեր զրուցակիցը: 

Վերլուծելով ներկա իրավիճակը, գնահատելով հեղափոխությունից հետո առկա ձեռքբերումներն ու խնդիրները՝ դերասան Գուժ Մանուկյանն, այնուամենայնիվ, ընդգծեց, որ ճանապարհը, որով գնում ենք, ճիշտ է:

«Ընտրված ուղին պետք է որ ճիշտ լինի: Ես ևս հետևում եմ իրադարձություններին, վատ ուղի չէ, բայց այդ ուղին ունի իր դժվարությունները, որոնք պետք է հաղթահարել: Ես չգիտեմ՝ հետագայում ի՞նչ է լինելու, բայց, համենայն դեպս, սպասումները բավականին մեծ են: Մենք մեր դարն ապրել ենք՝ այս ամենն ու դրա արդյունքը շատ կարևոր է մեր երիտասարդության համար: Տեսնենք, թե ինչպես կլինի: Չգիտեմ... Հույս կա, որ լավ է լինելու և այդ հույսով ենք ապրում»,–նշեց նա՝ կարևորելով հատկապես նոր աշխատատեղերի ստեղծման ու հայրենադարձության հարցը: 

Գուժ Մանուկյանը շեշտեց, որ հեղափոխությունից հետո մարտահրավերները շատ են, որոնք պետք է հաղթահարել: Նա ընդգծեց, որ հենց փոքր խնդիրներից պետք է սկսել: «Այնքան մանր խնդիրներ կան, և նոր իշխանության անելիքները կախված են հենց այդ խնդիրներից: Օրինակ՝ աշխատատեղերից մինչև քաղաքաշինություն, աղբահանությունից մինչև ավելորդ շինարարություններ, որոնց պատճառով քաղաքն ընկնում է տեսքից: Այնքան մանր թերություններ կան, բայց երբ դրանք իրար են միանում, ստացվում է մի գլոբալ խնդիր, որը լուծելը բավականին բարդ է, բայց ոչ անհնար»,–եզրափակեց դերասանը: