Կանաչ տանիքներ, ջրային ավազաններ և մի ամբողջ տետր առաջարկություններ ու խնդիրներ. «Փաստ»

«Փաստ» օրաթերթը գրում է.

«Ռեֆորմիստներ» կուսակցության քաղաքապետի թեկնածու Արտակ Ավետյանը, ով աշխատում է որպես շինարարական աշխատանքների կոորդինատոր, մասնագիտությամբ ռեժիսոր է: «Փաստի» հետ զրույցում նա նշեց, որ ունի ղեկավարման փորձ, և երևանցիները ընտրություն անելուց առաջ պետք է նայեն նաև կուսակցությունների ու դաշինքների ներկայացրած քաղաքապետի թեկնածուների արժանիքներին ու կառավարման հմտություններին:

«Ընտրություն անելուց առաջ պետք է նաև հաշվի առնել, թե քաղաքապետի թեկնածոները և ավագանու թեկնածուներն ընդհանրապես որքանով են կատարում իրենց խոստումները»,– ասաց Ա.Ավետյանը:

Թեկնածուի ներկայացմամբ, «Ռեֆորմիստների» կողմից առաջարկվող ծրագիրն իրատեսական է և այն շատ հեշտ կլինի կյանքի կոչել: Կարգախոսը՝ «Կանաչ Երևանն» է, որը ոչ միայն կանաչապատման, այլև ջրային ավազանների ավելացման հարցն է կարևորում: «Ի դեպ, ամենևին էլ շատ գումար պետք չէ «կանաչ տանիքներ» նախագիծն իրականացնելու համար: Բացի այդ, մենք մտադիր ենք ներգրավել մասնավոր ներդրումներ: Կան ներդրողներ, ովքեր սիրով պատրաստ են աջակցել այդ հարցում: Մեր ընտրվելու դեպքում առաջնային խնդիր է լինելու նաև ձմռան նախապատրաստական աշխատանքների իրականացումը, քանի որ ասում են, որ այս տարի Երևան քաղաքում բավականին տեղումնաշատ ձմեռ է լինելու: Ուստի պետք է լուրջ պատրաստվել ձմռանը, զուգահեռաբար նաև մյուս ծրագրերն իրականացնել: Ինչ վերաբերում է մայրաքաղաքի խնդիրներին, ապա դրանք, չնայած տարբեր թաղամասերում տարբեր են, բայց կան նաև սպեցիֆիկ խնդիրներ, որոնք միայն տվյալ թաղամասին են բնորոշ», – ասաց Ա. Ավետյանը:

Խոսելով Երևանի թամանյանական դիմագիծը վաղուց կորցնելու մասին՝ նա նշեց, որ իրականում թամանյանական Երևանից ոչինչ էլ չի մնացել: Նախագծի համաձայն, Երևանը պետք է քաղաք–այգի լիներ, սակայն հիմա գրեթե բոլոր ջրային մակերեսները վերացել են, կանաչապատված մակերեսները զգալի կրճատվել են և քաղաքը նմանեցրել անհասկանալի դիմագիծ ունեցող մի բնակավայրի:

«Անկախության տարիներին մեզ մոտ քաղաքաշինություն չի եղել: Եղել է ուղղակի շինարարություն և քաղաքի հատկապես կենտրոնը կորցրել է իր դեմքը: Խնդիր է նաև այն, որ Երևան քաղաքն անգամ իր խորհրդանիշը չունի: Եվ եթե օրինակ ժամանակին դա «Երիտասարդության պալատն էր», ապա «Զվարթնոց» օդանավակայանը, հիմա նման խորհրդանիշներ Երևանը չունի: Ինչ–որ չափով դա կարելի է վերագրել Մատենադարանի շենքին, բայց այն նույնպես որպես Երևան քաղաքի խորհրդանիշ աբողջական չէ: Ինչ վերաբերում է վերևից Երևանի կենտրոնի տեսարանը բարելավելուն, ապա մեր ծրագրի տանիքների կանաչապատումը վերաբերում է նաև տանիքները կանաչ գույնով ներկելուն: Եվ չնայած դա բարդ պրոցես է և ժամանակ է պահանջում, սակայն հարկավոր է օրենք ընդունել, որ այսուհետ շենքեր կառուցելու դեպքում տանիքները պետք է կանաչ լինեն: Եվ 15–20 տարի հետո մենք կունենանք կանաչ տանիքներով քաղաք, որն ավելի գեղեցիկ և գրավիչ կլինի բոլորիս համար»,– ասաց Ա. Ավետյանը:

Նա նաև նշեց, որ իրենք որևէ քաղաքական ուժի մրցակից չեն համարում, քանի որ բոլորն էլ պայքարում են Երևանն ավելի լավը դարձնելու համար: Ինչ վերաբերում է արդյունքներին, նրա կարծիքով, ամեն ինչ լավ է լինելու, քանի որ ընտրարշավի ընթացքում կազմակերպվող հանդիպումները ցույց են տվել, որ ընտրողները բավականին դրականորեն են տրամադրված իրենց ուժի նկատմամբ:

«Համոզված եմ, որ մենք բավականին լավ արդյունքներ կգրանցենք: Ու թեև ընտրարշավի ընթացքում առավոտյան 10–ից մինչև երեկոյան 9–ը մենք հանդիպում ենք մեր ընտրողների հետ, որը մտերմիկ զրույցների ձևաչափով է ընթանում, առանց տեսախցիկների առկայության, քանի որ այդպես են ցանկանում նրանք, գրանցում ենք բոլոր խնդիրները, նույնիսկ նրանք, որոնք նախորդ իշխանություններից են ժառանգություն մնացել: Ես գերադասում եմ ոչ շատ մարդաշատ հանդիպումները, քանի որ կարծում եմ, որ պետք է բոլոր ընտրողներին լսելու հնարավորություն ունենալ և դրանք գրի առնել»,– ասաց Ա. Ավետյանը:

Ի դեպ, «Ռեֆորմիստների» թեկնածուն նշեց նաև, որ քարոզարշավից առաջ 48 թերթանոց տետր է առանձնացրել՝ երևանցիների ցանկություններն ու առաջարկությունները գրի առնելու համար: Ու չնայած դեռ ընտրարշավը չի ավարտվել, բայց երևանցիների խնդիրներն այնքան շատ են եղել, որ տետրի դատարկ էջերից գրեթե ոչինչ չի մնացել: Ա. Ավետյանը նշեց, որ քաղաքապետ ընտրվելու դեպքում քաղաքի խնդիրների առաջնահերթությունները դասակարգելու դեպքում հետագայում կուղղորդվի այդ տետրի գրառումներով, իսկ եթե մեկ այլ թեկնածու դառնա քաղաքապետ, ապա նա պատրաստ է իր գրառումները սիրով հանձնել ընտրված քաղաքապետին: