ՀՀ-ում օլիգարխիա և օլիգարխներ այլևս գոյություն չունեն, դադարեցրեք ձեր դրամապանակներով զարմացնելու գործընթացը, հակառակ դեպքում դուք ամեն օր կզարմանաք. Ն. Փաշինյան

Վերջին մեկ շաբաթվա ընթացքում մեր քաղաքական մյուս ուժերի կողմից, որոնք մասնակցում են Երևանի ավագանու ընտրություններին, մտահոգություններ են հնչում, որ ես ակտիվ մասնակցում եմ Երևանի ավագանու ընտրությունների քարոզարշավին: Իհարկե, մենք բացատրել ենք, որ դա համապատասխանում է ՀՀ օրենքին, քաղաքականությանը: 

Այս մասին այսօր Գարեգին Նժդեհի հրապարակում «Իմ քայլը» դաշինքի հրավիրած հանրահավաքի ժամանակ հայտարարեց ՀՀ վարչապետ, «Քաղաքացիական պայմանագիր» կուսակցության նախագահ Նիկոլ Փաշինյանը: Նա նշեց, որ հենց այդ պատճառով էլ երեկ Նոր Նորքի վարչական շրջանում հանրահավաքին չի մասնակցել, այդ իսկ պատճառով էլ նրանցից ներողություն խնդրեց: 

Ապա վարչապետը հայտարարեց՝ շատ լավ գիտի, որ Հայաստանում սոցիալական խնդիրները շատ են, սակայն ինքը չի ուզում, որ այնպես լինի, որ կառավարությունն ուղղակի հաց տվողի դեր ստանձնի, լինեն մի քանի օլիգարխներ:

Մենք ասում ենք, որ ՀՀ-ում պետք չի, որ լինեն այնպիսի մարդիկ, որ լինեն արտոնյալ, մեզ պետք չի, որ ՀՀ-ում իրար հետևից 10 հատ նույն համարով ավտոներ պտտվեն շարասյուներով: Բոլոր նրանք, ում հաճույք է պատճառով լինել կամ կոչվել օլիգարխ, նրանք չեն հասկանում եղած հեղափոխության իմաստը, ՀՀ-ում չկա ավելի բարձր կոչում, քան է ՀՀ քաղաքացին»,-հայտարարեց Նիկոլ Փաշինյանը: 

Նա բոլոր այդ մարդկանց հորդորեց դադարեցնել այդ բազմահարյուր մեքենաներով՝ նույն գույներով, նույն անտենաներով, շրջելը: «Պետք չի սեփական հարստությունը, սեփական ավտոներն ու կոշիկները, սեփական վերտուները ժողովրդի աչքը մտցնել, դադարեցրեք ձեր դրամապանակներով բոլորին զարմացնելու գործընթացը, հակառակ դեպքում դուք ամեն օր կզարմանաք»,-ընդգծեց նա՝ հավելելով, որ ՀՀ-ում չպիտի լինեն ապօրինի շարասյուներ, որոնք քշում են ուրիշ մարդկանց կամ մեքենաների վրայով: