Տեղի ունեցավ Հայաստանի Քրիստոնե-դեմակրատական կուսակցության հիմնադիր վեհաժողովը

Մելիք Ադամյան 5 հասցեում մեկնարկեց Հայաստանի Քրիստոնե-դեմակրատական կուսակցության առաջին համագումարը` հիմնադիր վեհաժողովը: ՀՀ պետական օրնհներգին հաջորդեց կուսակցության օրհներգը:

Նախքան ելույթները, զեկույցով հանդես եկավ կուսակցության նախաձեռնող խմբի անդամներից քաղաքագետ Լևոն Շիրինյանը:

«Քրիստոնեա-դեմոկրատական կուսակցությունը քաղաքական բեմահարթակի վրա կզբաղեցնի մի տեղ, որը մինչ այժմ ՀՀ անկախության 30 տարիների ընթացքում որևէ կազմակերպություն չի զբաղեցրել: Դրա անհրաժեշտությունն առաջացել է «Թավշյա հեղափոխության» ժամանակ հռչակածն իրականություն դարձնելու և մեր ժողովրդի կարևորագույն նվաճումը պաշտպանելու համար»,-հայտարարեց Լևոն Շիրինյանը:

Կուսակցությունը ձևավորվում է Հայ առաքելական եկեղեցու քարոզած արժեհամակարգի վրա, սակայն կրոնական կառույց չի լինելու և կառավարվելու է դեմոկրատական զարգացման հայեցակարգով՝ քրիստոնեական ժողովրդավարություն՝ գումարած ընկերակցային ժողովրդավարություն:

Կուսակցությունն իրեն հայտարարում է նաև  հայամետ, ազգային-պահպանողական  կուսակցություն, առաջիկա խորհրդարանական ընտրություններին մասնակցելով, հաջողության դեպքում, ունենալու է աջ կենտրոնամետ դիրք: Ենթադրվում է, որ այդ աջ բևեռում՝ կլինեն նաև դասական իմաստով՝ազատականներ ու  պահպանողականներ, որոնց հետ ԱԺ-ում կամ մեկ բևեռ կզբաղեցնեն, կամ շատ սերտ կհամագործակցեն:  Լևոն Շիրինյանը շեշտեց՝ ամեն ինչ կանեն, որպեսզի խորհրդարանը դառնա քաղաքական մարմին, ոչ թե շահերի բախման ասպարեզ՝ տարբեր խմբերի գործունեության համար:

«Սրանից, անշուշտ, կշահի Հայաստանի Հանրապետությունը, ժողովուրդը, բայց չի շահի օլիգարխիան: Եվ սա մեր պատմական հնարավորությունն է»,-ավելացրեց քաղաքագետը:

Հիշեցնենք, որ կուսակցության նախաձեռնող խմբի անդամներ են՝ քաղաքական գիտությունների դոկտոր, պրոֆեսոր Լևոն Շիրինյանը, իրավաբան, սահմանադրագետ Վարդան Այվազյանը, երաժշտագետ Աշոտ Արիյանը, տնտեսագետներ և հասարակական մի շարք այլ գործիչներ:

Քարի վերամշակում, արտադրություն և արտահանում. սա կուսակցության գաղափարախոսությունը կրողների համար պետք է դառնա ՀՀ տնտեսության շարժիչ ուժը և Հայաստանին հնարավորություն կտա լինել «քարի մոնոպոլիստ»՝ ողջ աշխարհում:

Լևոն Շիրինյանը հպանցիկ ներկայացրեց նորաստեղծ կուսակցության արտաքին քաղաքական գիծը:

«Սա պետության խնդիր է, բայց կուսակցությունը պետք է ունենա սկզբունք: Այս իմաստով՝ մենք մեզ համարում ենք հայամետ, իսկ Հայաստանի քաղաքականությունը՝ հայակենտրոն: Դաշնակիցների հարցն այս երկու պարամետրերի վրա կաշխատի: Կարևորը՝ մենք Ռուսաստանի հետ մինչև հիմա անտեսված հարցեր ունենք:

Մենք առաջարկում ենք Ռուսաստանի հետ մեր փոխհարաբերությունների մեկնակետ վերադարձնել 1920 թ. դեկտեմբերի 2-ի Երևանի համաձայնագիրը»,-ավելացրեց Լևոն Շիրինյանը:

Նախագծի 1-ին հոդվածում ասվում էր, որ Բոլշևիկյան Ռուսաստանի կառավարությունը, ելնելով ազգերի ազատ ինքնորոշման իրավունքից, անվերապահորեն ճանաչում է Հայաստանի ինքնուրույնությունն ու անկախությունը, հոժարակամ հրաժարվում հայ ժողովրդի և նրա տարածքի նկատմամբ Ռուսաստանի բոլոր ինքնիշխան իրավունքներից։ Այս հոդվածի ծանոթագրության մեջ նշված էր, որ ՌԽՖՍՀ արդարացի է համարում Թուրքահայաստանի մարզերի միացումը Հայաստանի Հանրապետությանը և պարտավորվում է ազդել իր դաշնակից պետությունների վրա՝ նշված մարզերը կամ նրանց որոշ մասերը Հայաստանին միացնելու համար։Իսկ  2-րդ հոդվածով՝ Բոլշևիկյան Ռուսաստանը պարտավորվում էր չխառնվել Հայաստանի ներքին գործերին։ Ինչպես նաև՝։ Ռուսաստանն ընդունում էր, որ Կարսի մարզը և Երևանի նահանգը (բացի Նախիջևանի գավառից), ինչպես նաև Ղազախի գավառի մի մասը (Դիլիջան-Քարվանսարայի շրջանը) անպայման կազմում են հայկական պետության տարածք, իսկ Հայաստանի և Ադրբեջանի միջև վիճելի համարվող Ղարաբաղի, Զանգեզուրի և Նախիջևանի պետական պատկանելության հարցը համաձայնություն չկայանալու դեպքում լուծվելու էր հանրաքվեով։

Կուսակացության հյուրերի թվում են «Ժառանգություն» կուսակցության նախագահ Արմեն Մարտիրոսյանը, պատվիրակություն Չինաստանից: