«Կա՛մ հրշեջ ես, կա՛մ հրկիզող». «Փաստ»

 ԱԱԾ և ՀՔԾ ղեկավարների հեռախոսազրույցի հրապարակումը, որպես երևույթ, ըստ ՀՀ Գերագույն խորհրդի նախկին պատգամավոր Ազատ Արշակյանի, իր դրական հետևանքը կունենա:

 

«Շատերն ինչ–որ տագնապ ունեն, թե պետությունը «խանձվեց», «քերծվեց», բայց ես չեմ կարծում: Նախ՝ կթարմացվեն տեխնիկական միջոցները, ինֆորմացիան կգաղտնագրվի ավելի հզոր միջոցներով, իսկ բովանդակային առումով, իհարկե, հետևություններ կարվեն: Իսկ նման հետևություններ արդեն եղել են, օրինակ՝ իշխանությունը երևույթը գնահատեց որպես գրոհ ու հարձակում պետականության վրա. կարևոր չէ՝ դրսի՞ց, թե՞ ներսից: Իսկ վարչապետ Նիկոլ Փաշինյանի հայտարարությունն այն մասին էր, որ պատիժը խիստ է լինելու. մենք գիտենք՝ ով է շահելու այդ գրոհից, այդ հարձակումն ում է ձեռնտու և նրանց կպատժենք: Այսինքն՝ ովքեր պետք է շահեին՝ կտուժեն»,– «Փաստ»–ի հետ զրույցում ասաց Ազատ Արշակյանը: 

 

Վերջինիս համար «ասֆալտին պառկեցնելու» և ռեյդ իրականացնելու վերաբերյալ Ն. Փաշինյանի հայտարարությունը զգաստացնող էր. «Այն բարությունը թուլություն չհամարելու հայտարարություն էր: Իսկ ասֆալտին պառկեցնելը խորհրդանշական էր, թե չէ սալահատակի ու մանրահատակի վրա էլ կարելի է պառկեցնել: Մեծ հաշվով՝ իրավաչափ ուժ կիրառելու մասին էր»: 

 

Անդրադառնալով սևերի ու սպիտակների բաժանմանը և դրանից բխող քաղաքական ճգնաժամի հնարավորությանը՝ Ազատ Արշակյանը նկատեց.

 

««Այո»–ն պետք է այո լինի, «ոչ»–ը՝ ոչ: Սևին պետք է սև ասենք, սպիտակին՝ սպիտակ: Քաղաքական առումով մեր հակառակորդի հետ մենք պետք է վարվենք այնպես, ինչին արժանի է: Եթե սև են՝ մենք ուրիշ գույն պետք է ընտրենք, և հարմարը սպիտակն է: Իսկ մյուս գույների մեջ ամբողջ համակարգն է, ուր կան դաշնակիցներ, չեզոքներ, կոալիցիաներ: Իսկ պայքարի մեջ ազնիվ պետք է լինել, եթե դաշնակից ենք՝ դաշնակից ենք, մրցակից, ուրեմն՝ մրցակից: Բայց հրդեհի ժամանակ չեզոք լինելը չեմ հասկանում: Եթե հրդեհ է, դու կա՛մ հրշեջ ես, կա՛մ հրկիզող: Իսկ հրդեհը կարելի է նաև միասին հանգցնել, ուր դու կամ հրշեջների հետ ես, կամ հրկիզողների: Իսկ քաղաքական բազմակարծությունը միանգամայն այլ բան է»:

 

Դիտարկմանը, թե տարիներ շարունակ նաև նույն սևի ու սպիտակի բաժանումը չէ՞ր, որ բերեց մի վիճակի, ինչը դեռ ունենք, նա պատասխանեց

 

«Բաժանում չի եղել: Քաղաքական կյանքը խաթարված է եղել, ինչը բաժանում չէ: Իսկ հիմա նախկին քրեաօլիգարխիկ իշխանությունը ոչ միայն չի ուզում հանձնվել, այլև ուզում է օգտվել բարիքներից: Նա ռեսուրսներ է ուզում և չի ուզում պոկվել ռեսուրսներից: Նախկին իշխանությունը պայքարում է իր արտոնությունների համար: Տա՞նք այդ արտոնությունները, Հայաստանում արտոնյալներ լինելո՞ւ են: Եթե այո, ուրեմն նրանց պետք է թույլ տանք, որ շարունակեն իշխել: Եթե ես դեմ եմ նրանց արտոնություններ տալուն, սև ե՞մ, թե՞ սպիտակ: Եթե կողմ եմ նրանց արտոնություններին, ուրեմն դեմ եմ արդարությանը: Իսկ դա արդարություն չէ՝ անարդարություն է, և այդ «սևը» պետք է ջնջել»:

 

Ինչ վերաբերում է ընտրական գործընթացներում նոր իշխանության պահվածքին, իշխանական սինդրոմին, Ազատ Արշակյանը նշեց, որ ցանկացած իշխանություն օգտվելու է իշխանության տված ռեսուրսներից:

 

«Հակառակ դեպքում իշխանություն ոչ ոք չի ուզի: Մարդիկ իշխանությունն ուզում են այն, այսպես ասած, չարաշահելու համար, եթե «չչարաշահեն», իշխանությունն ո՞ւմ է պետք: Ընտրությունների ժամանակ այս իշխանությունն էլ կօգտվի ռեսուրսներից, չարաշահել բառը չակերտների մեջ եմ օգտագործում, որովհետև այլ հարց է, թե նոր իշխանությունը օրենքը կխախտի՞, թե՞ ոչ: Մենք ուշադիր հետևում ենք, բայց որ օգտվելու է իշխանության տված առավելություններից, չեմ կասկածում»,–եզրափակեց նա: 

 

Մանրամասները՝ «Փաստ» օրաթերթի այսօրվա համարում