Երևանցին այլևս չպետք է իր հոգսերի հետ միայնակ մնա. «Փաստ»

ՀԱՍԱՐԱԿՈՒԹՅՈՒՆ 12 Սեպտեմբեր, 2018 8:03

«Փաստ» օրաթերթը գրում է.

Խաչատուր Աբովյանի հետնորդ, Երևանի ավագանու ԲՀԿ ցուցակի երրորդ համար Արման Աբովյանը շատ լավատեսորեն է տրամադրված քարոզարշավին և կարծում է, որ մայրաքաղաքում չկա մի քառակուսի մետր, որը չունենա իր պատմությունը, ինչն ավելի է պարտավորեցնում իրեն:

Ընտրապայքարի ժամանակ նրա ամենաարևոր ցանկությունն է, որ ընտրարշավին մասնակցող բոլոր ուժերը կարողանան ի վերջո կառուցողական պայքար մղել միմյանց հետ:

«Ինչպես ես, այնպես էլ ԲՀԿ բոլոր անդամները, քաղաքապետի թեկնածու, մեր հիասքանչ Նաիրա Զոհրաբյանի գլխավորությամբ, ամեն ինչ անելու ենք, որպեսզի այս ընտրություններն անցնեն միայն և միայն ժպիտի և պոզիտիվ էմոցիաների ներքո: Ես բնիկ երևանցի եմ, ինձ համար այս ամենը կյանք է, քանի որ հնարավորություն եմ ստացել ավելի լայն ասպեկտով շփվել մարդկանց հետ: Ես դրանով եմ ապրում և հույս ունեմ, որ ամեն ինչ լավ է լինելու»,– ասաց Ա. Աբովյանը:

Ընտրարշավի մասին կարծիք հայտնելը նա թեև վաղ է համարում, բայցև նշում է, որ նախորդ բոլոր ընտրությունների ժամանակ մարդիկ այսքան դրական տրամադրվածություն չեն ցուցաբերել միմյանց ու ընտրությունների նկատմամբ, իսկ նման պայծառ տրամադրությունն, ըստ նրա, վերջին մի քանի ամիսների ձեռքբերումն է:

«Բացի այդ, ամենակարևոր խնդիրն այն է, որ այս թավշյա հեղափոխությունը հնարավորություն տվեց մարդկանց լիարժեք օգտվել իրենց սահմանադրական իրավունքներից: Նախկինում թեև մարդիկ նույնպես իրավունքներ ունեին, բայց, ցավոք, այն չէր գործում: Մարդիկ չէին կարողանում իրենց ձանը լիարժեք արտահայտել: Հիմա համոզված են, որ իրենց ձայնը որոշիչ է ու տեղ է հասնելու: Եվ մենք կանենք ամեն ինչ, որպեսզի որևէ ընտրողի ձայն չփոշիանա: Դա ես վստահ եմ ասում, ժողովուրդ, չկասկածեք ու «մուֆթա» տեղը կրքերը չբորբոքեք»,– ասաց Ա. Աբովյանը:

ԱԺ «Ծառուկյան» դաշինքի պատգամավոր Սերգեյ Բագրատյանն էլ «Փաստի» հետ զրույցում նշեց, որ հայկական զարթոնքից հետո այս ընտրություններն առաջինն են և բոլորը սպասում են, որ այն լինելու է արդար և թափանցիկ:

«Ամենակարևորն այն է, որ ինքներս մեզ ապացուցենք, որ մենք ի վիճակի ենք արդար ընտրություններ անցկացնել: Բոլոր ուժերին մաղթում եմ հաջողություն: Ժողովրդի հավաքական իմաստնությունը միշտ ճիշտ է լինում: Մեզանից բացի ժողովուրդն ում էլ ընտրի, մենք առաջինը կշնորհավորենք այդ ուժին: Երևանն այնքան խնդիրներ ունի, որ ընտրությունների հենց հաջորդ օրվանից բոլորս պետք է լծվենք աշխատանքի: Այսինքն, Երևանին ու երևանցիներին ծանր աշխատանք է սպասվում: Եթե մենք մաքրենք, գեղեցկացնենք մեր քաղաքը, փոխենք Երևանի դիմագիծը և կարողանանք պահպանել այն ժպիտը, որն իր հետ բերել է այս համազգային զարթոնքը, այս հեղափոխական շարժումը կշարունակի թևածել մեր երկնակամարում ընդմիշտ: Այլևս երևանցին երբեք չպետք է իրեն մենակ զգա իր հոգսերի ու խնդիրների հետ միասին: Երևանցին պետք է վստահ լինի, որ իր ընտրած թեկնածուն իսկապես արդարացնելու է իր բոլոր հույսերը»,– ասաց Ս. Բագրատյանը:

Մանրամասները՝ «Փաստ» օրաթերթի այսօրվա համարում