«Հայհոյանքից պաշտպանելու լրացուցիչ մեխանիզմներ հորինելը ջուրծեծոցի է». «Փաստ»

«Փաստ» օրաթերթը գրում է.

ՀՀ փաստաբանների պալատն առաջարկում է քրեականացնել հայհոյանքն ու Քրեական օրենսգիրքը լրացնել հետևյալ բովանդակությամբ. Հայհոյանքը՝ խոսքի, պատկերի, ձայնի, նշանի կամ այլ եղանակով հանրորեն հայտնի անպարկեշտ բառերի և հասկացությունների հրապարակային արտահայտումը համացանցում կամ զանգվածային լրատվության միջոցներով՝ ուրիշի պատիվն ու արժանապատվությունն արատավորելու նպատակով` պատժվում է տուգանքով՝ նվազագույն աշխատավարձի հարյուրապատիկից երկուհարյուրապատիկի չափով կամ կալանքով՝ մինչև մեկ ամիս ժամկետով»:

Փաստաբան Երվանդ Վարոսյանի խոսքով, առհասարակ, վիրավորանքի կամ զրպարտության հարցը Հայաստանի Հանրապետությունում օրինական կարգով լուծված է:

«Քաղաքացիական օրենսգրքում կա համապատասխան հոդված, ըստ որի` եթե անձը գտնում է, որ իրեն վիրավորել են կամ զրպարտել, օրենքով սահմանված մեխանիզմներով պաշտպանվելու հնարավորություն ունի: Հայհոյանքից ինչ–որ մեկին պաշտպանելու համար լրացուցիչ ինչ–որ մեխանիզմներ հորինելը ջուրծեծոցի է: ՓՊ հիմնավորումները ողջամիտ և տեղին չեն: Սա ժամանակ սպանելու հերթական հնարավորությունն է իրենց կողմից: Այդ առաջարկը, որը ներկայացվել է Արդարադատության նախարարությանը, որն էլ այդ ամենը լուրջ է ընդունել, իրավաբանության հետ առհասարակ կապ չունի»,–«Փաստ»–ի հետ զրույցում ասաց Ե. Վարոսյանը:

Փաստաբանը շեշտեց` ի՞նչ ասել է հայհոյանք, ի՞նչ ասել է` հանրորեն հայտնի անպարկեշտ բառերի և հասկացությունների հրապարակային արտահայտում:

«Եթե հայհոյանքը փորձում ես քրեականացնել, հստակ և բառ առ բառ յուրաքանչյուր հայհոյանք պետք է օրենքում նշված լինի, որովհետև օրենքը պետք է կանխատեսելի լինի քաղաքացու համար: Քաղաքացին պետք է բառացի իմանա, թե ինչն է իրեն արգելվում արտաբերել: Կարծում եմ` սա փաստաբանների պալատում առկա լրջագույն խնդիրները կոծկելու միտում ունի և այդ ամենը շեղելու համար է արվում: Արդարադատության նախարարը նամակ է գրել փաստաբանների պալատին: ՓՊ–ն էլ մեզ տեղեկացրել է, որ նախարարը պատրաստվում է այդ փաթեթը դնել շրջանառության մեջ: Ես չեմ ցանկանա հավատալ, որ ԱՆ–ն ևս լծվել է այս հիմարաբանությանը` փորձելով կոծկել ՓՊ–ում տիրող իրավիճակը: Ես նախարար Արտակ Զեյնալ յանին հստակ ներկայացրել եմ, թե ինչ է կատարվում ՓՊ–ում. ծախսվում են պետական միջոցները, որոնց հայտերն ինքն անձամբ է հաստատում: Բայց մինչ օրս քար լռություն է, փոխարենը` այդ հիմարաբանությունը շրջանառության մեջ դնելու ցանկություն կա: Սա ի՞նչ է, ես հետևողական եմ լինելու: Խորհուրդ կտայի զբաղվել պետական միջոցների մսխումների հարցով և ոչ թե այդպիսի դատարկաբանություններով: Ի վերջո, մենք հեղափոխություն ենք արել, որ մեր պետական պաշտոնյաները աչք փակե՞ն չարաշահումների վրա, մենք դա թույլ չենք տալու: Ես որտե՞ղ պետք է դրական տեղաշարժ տեսնեի, երբ աչք է փակվում այն հանգամանքի վրա, որ պետական միջոցներով, իմ և ձեր հարկերով վճարվող մեքենան, որը պետությունը հանրային պաշտպաններին դատարաններ, մեկուսարաններ տեղափոխելու համար է տրամադրել, ՓՊ նախագահն ապօրինի օգտագործում է որպես իր ծառայողական մեքենա: Ես ուզում եմ հասկանալ, սա նկատելո՞ւ է նախարարը, թե՞ ոչ: Ես արդեն երեք ամիս է` սպասում եմ: Բացի այդ` հստակ նշել եմ, որ հանրային պաշտպանի գրասենյակի կարիքների համար պետության կողմից փոխանցվող ամսական 4 միլիոն դրամը ոչ նպատակային է ծախսվում: Այդ գումարները վերցնում, արհեստականորեն ուռճացված ՓՊ աշխատակազմի աշխատավարձերն են վճարում, որի իրավունքը չունեն: Իսկ երբ տեսնում եմ, որ դրա փոխարեն նախարարը նկատել է հայհոյանքը քրեականացնելու ինչ–որ թուղթ, զայրանում եմ: Պարո՛ն նախարար, եթե պատրաստվում եք այդ թուղթը դնել շրջանառության մեջ, իսկ ամսական 4 միլիոն դրամի վրա թքած ունեք, ապա ոչինչ չի փոխվել, ոչի՛նչ»,–նշեց մեր զրուցակիցը:

Երվանդ Վարոսյանը հայտնեց, որ այս ամբողջ ընթացքում այդ հարցերը բարձրացրել է Fecebook–ի իր էջում, նշել նաև նախարարին, բայց արձագանք չկա. «Քանի որ հիմա Արտակ Զեյնալյանը քարոզարշավով է զբաղված, ես ժամանակավորապես դադարեցրել եմ այդ երևույթների վերաբերյալ իմ գրառումները, թեպետ շարունակելու եմ նախարարին մշտապես տեղեկացնել դրանց մասին: Բայց ոչ թե լռություն, այլ արձագանք եմ ակնկալում»:

Փաստաբանը նշեց, որ վերոնշյալ նախագիծը լուրջ չէ, ուստի նպատակահարմար էլ չէ խորանալ ու հասկանալ, թե հետևանքն ինչ կարող է լինել. «Ես ուղղակի զարմացած եմ, որ ՀՀ պետական մարմինը դրանով զբաղվելու ժամանակ է գտել: Ամեն ինչ մի կողմ` քրեակատարողական հիմնարկների պատասխանատու մարմինը ժամանակ է գտել զբաղվել այդ հիմարաբանությամբ, սա է խնդիրը: Մենք լրջանալու, սթափվելու կարիք ունենք: Թող Արտակ Զեյնալ յանն իմ բարձրացրած հարցերն ու այդ հիմարաբանությունը նժարի վրա դնի և իրեն հարց տա` ինչո՞վ է զբաղված որպես նախարար և ի՞նչ տարբերություն իր և իր նախորդի միջև: Երբ այդ պատասխանը գտնի, թող հրապարակային պատասխանի իմ հարցադրումներին»: