Բրազիլիայի դեսպանը հեղափոխությունից հետո Հայաստանը համարում է ներդրումների համար ավելի բաց երկիր

Past.am

Հայաստանում Բրազիլիայի արտակարգ և լիազորդեսպան Աժեմար դե Մենդոնսա Սանկտոսը հեղափոխությունից հետո Հայաստանը ներդրումների և առհասարակ աշխարհի համար ավելի բաց երկիր է համարում: «Արմենպրես»-ի հաղորդմամբ՝ դեսպանը նման տեսակետ հայտնեց լրագրողների հետ հանդիպմանը:

«Մենք միշտ լավ հարաբերություններ ենք ունեցել Հայաստանի կառավարության հետ, քանի որ լավ հարաբերութուններ ունենք հայերի հետ: Իսկ Հայաստանի կառավարությունն այն գործիքն է, որով կապվում ենք հայ ժողովրդի հետ: Հեղափոխությունն այն ուղերձն է հղում, որ Հայաստանն ավելի բաց է աշխարհի և ներդրումների առաջ: Շատերը հեղափոխության ժամանակ հետաքրքրվում էին, թե ինչպիսին է լինելու ներդրումային դաշտը, ես այդ ժամանակ չգիտեի ինչ պատասխանել, սակայն հիմա տեսնում ենք, որ կառավարությունն ավելի բաց է»,-ասաց դեսպանը:

Հայաստանն ու Բրազիլիան կնքել են երկու պայմանագիր՝ կրթական և տեխնիկական ոլորտներին վերաբերող: Դեսպանի հավաստմամբ՝ կրթականն արդեն Բրազիլիայի սենատը վավերացրել է: Դրա շրջանակում Հայաստան պետք է գան ուսուցիչներ, դասախոսներ՝ փորձի փոխանակման նպատակով: Հույս ունի, որ մյուս պայմանագրի վավերացումը տեղի կունենա մինչև մյուս ամառ:

Աժեմար դե Մենդոնսա Սանկտոսը նշեց, որ ինքը՝ որպես դեսպան, իր երկրին է փոխանցում տեղեկություններ Հայաստանի ներդրումային դաշտի, տնտեսության մասին: Անդրադառնալով բրազիլահայերին՝ ասաց, որ նրանք շատ ակտիվ են եղել և շարունակում են ներդրումներ անել, նաև օգնություն են փոխանցում Հայաստանին: