«ՀՀԿ–ին բացասական կերպարի խարանից մաքրվել չի հաջողվի, անգամ մինչև 22 թվականի ընտրություններ». «Փաստ»

«Փաստ» օրաթերթը գրում է.

Քաղաքագետ Նարեկ Գալստյանի դիտարկմամբ, վերջին 20 տարիների ընթացքում մեկ իշխող կուսակցության կողմից քաղաքականություն թելադրելու հնարավորությունից զրկվելուց և իշխանափոխությունից հետո քաղաքական դաշտն ինչ–որ տեղ կոլապսի է ենթարկվել: Վակուումային այդ իրավիճակի պատճառն, ըստ նրա, խոսում է կուսակցական համակարգի անկատարության մասին: 

«Բանն այն է, որ այդ տարիների ընթացքում մեզ մոտ ձևավորվել էր մեկ գերիշխող կուսակցության համակարգ, որն անընդհատ իշխանության ղեկին էր: Մյուս կուսակցությունները հիմնականում եղել են իշխող կուսակցության կրտսեր գործընկերները: Այդ հինավուրց ու խորը արմատներ գցած «ծառի» տապալվելուց հետո դաշտում վակուում է առաջացել, և քաղաքական արևին սկսել են ձգտել շատ ու շատ կուսակցություններ: Նաև շատ ու շատ քաղաքական խմբեր են ի հայտ եկել, որոնք ցանկանում են իշխանության մաս դառնալ: Եվ բավականին մեծ է հավանականությունը, որ մենք այլ կուսակցությունների ծնվելուն ականատես կլինենք»,– ասաց Ն. Գալստյանը

Սա որոշակի ակտիվություն է բերելու քաղաքական դաշտում, համոզված է քաղաքագետը, բայց, մյուս կողմից, քաղաքագիտական տեսանկյունից ավելի ուշագրավ է «ծառի» տապալումից հետո տեղի ունեցած իրադարձությունների ամբողջությունը: 

«Տեսադաշտում հայտնված քաղաքական ուժն իշխող դիրք գրավեց Նիկոլ Փաշինյանի հեղինակության գերակշռող լինելու, ոչ թե իր կուսակցության շնորհիվ: Բայց այդ դաշտում նույնպես պետք է որոշակի վերադասավորումներ լինեն, որպեսզի Փաշինյանի իմիջը տրանսֆորմացվի որպես ինստիտուցիոնալ իմիջ: Խոսքը «Ելք» դաշինքի մաս կազմող կուսակցությունների մասին է»,– ասաց Ն. Գալստյանը:

Ինչ վերաբերում է առաջիկայում սպասվող վերադասավորումներին, ապա, ըստ քաղաքագետի, Երևանի ավագանու ընտրությունների ժամանակ որոշակի քաղաքական էներգիայի պարպումից հետո շատ ավելի տեսանելի կլինի, թե արտահերթ խորհրդարանական ընտրությունների ժամանակ ով ուր է ցանկանում գնալ: Իսկ բուն պայքարը ոչ թե գաղափարախոսական է լինելու, այլ՝ գաղափարական, քանի որ ողջ աշխարհում զարգացումներն այդպիսին են: 

«Ազդեցիկ են դառնում այն կուսակցությունները, որոնք տարբեր գաղափարների կուսակցություններ են և այդ հենքի վրա են հասնում իշխանության, ինչպես Մակրոնի կուսակցության դեպքում եղավ: Կարծում եմ՝ առաջիկայում կտեսնենք այդպիսի մրցապայքար, ինչը շատ ուրախալի է»,– ասաց Ն. Գալստյանը:

Քաղաքագետի կարծիքով, առաջիկա խորհրդարանական ընտրությունները թեև բավականին բարդ են ընթանալու, սակայն մարդիկ առավելապես իրենց քվեն կնախընտրեն տալ ոչ թե ծրագրերին, այլ՝ անձանց: Եվ քանի որ պարզ երևում է, որ Նիկոլ Փաշինյանի կուսակցությունում կադրային հարցերն ակնառու են, ապա չի բացառվում, որ հրապարակում նրան ընտրած մարդիկ գնան այլ ճանապարհով: Ավելին, հրապարակում ոչ թե Փաշինյանի կուսակցությունը վարչապետի պաշտոնում իր թեկնածուին ներկայացնելու լիազորություն ստացավ, այլ անձամբ Փաշինյանը, անկախ նրանից, թե ով է իր քաղաքական հենարանը:

Խոսելով Է. Շարմազանովի օրերս արած այն հայտարարության մասին, որ Հանրապետականը խորհրդարանը լուծարելու անհրաժեշտություն չի տեսնում և մինչև 22 թվականը պատրաստ է աշխատել, Ն. Գալստյանը տեսակետ հայտնեց, որ ստեղծված իրավիճակի պայմաններում ՀՀԿ–ն փորձում է իր հաշվարկներով առաջ գնալ: 

«Նրանք կփորձեն հնարավորինս ձգել ժամանակը, ժամանակ առ ժամանակ հարվածել ներկա իշխանություններին՝ ձգտելով նրանց իմիջը թուլացել: Կփորձեն նաև նոր իմիջով, վերակազմավորված, նոր դեմքով հանդես գալ, բայց միևնույն է, ՀՀԿ–ի 20 տարվա դոմինանտ կուսակցություն լինելու կերպարը և այդ ընթացքում նրանց կատարած գործողությունները չեն մոռացվի: Այսինքն, նրանց բացասական կերպարի խարանից մաքրվել չի հաջողվի, անգամ մինչև 22 թվականի ընտրություններ»,– ասաց Ն. Գալստյանը:

Ինչ վերաբերում է ՀՀ երկրորդ նախագահ Ռ. Քոչարյանի քաղաքականություն վերադառնալով նոր վերադասավորումների և քաղաքական նոր ծանրության կենտրոն ձևավորելու մասին, քաղաքագետը նշեց, որ չնայած նրա պոտենցիալին, այնուամենայնիվ, Քոչարյանը նույնպես բավականին բացասական իմիջ և, բնականաբար, նույնանման հիշողություններ է արթնացնում, ինչը պակաս կարևոր չէ: Իսկ նախկին իշխանությունների կողմից ռևանշի հնարավորությունը նա բավականին քիչ է համարում:

«Որոշ շրջաններում միգուցե ՀՀԿ–ն կարողանա վերականգնել իր իշխանությունը, բայց հանրապետության մասշտաբով՝ համապետական իշխանական բոլոր մարմիններում, ես կարծում եմ, որ իրենց դիրքերը վերականգնելու հնարավորություն չեն ունենա»,– ասաց Ն. Գալստյանը: