Ապրիլյանի մասնակից, «սպեցնազի» զինծառայող 40-ամյա Սասուն Միքայելյանին զրկել են հաշմանդամության կարգից (ֆոտո)

«Սպեցնազի» նախկին զինծառայող 40-ամյա Սասուն Միքայելյանը, ով վիրավորում է ստացել ապրիլյան պատերազմի ժամանակ, այսօր էլ առողջական խնդիրներ ունի, սակայն նրան զրկել են հաշմանդամության կարգից:

NEWS.am-ի հետ զրույցում Սասուն  Միքայելյանն ասաց, որ արդեն երեք տարի որպես պայմանագրային զինծառայող ընդգրկված է «Հատուկ ջոկատի կազմում», ավագ հետախույզ է եւ այսօր ունի առողջական լուրջ խնդիրներ, որոնք առաջացել են Ապրիլյան պատերազմի ընթացքում մարտական առաջադրանք կատարելիս.

«Մինչ ծառայելը անվտանգության աշխատակից եմ եղել տարբեր հիմնարկներում, 2015-ին անցա պայմանագրային ծառայության սպեցնազի կազմում: Տարբեր առաջադրանքներ ենք կատարել սահմանին՝ նույնիսկ լազերային զենքից աչքի վիրավորում եմ ստացել: Ապրիլյան պատերազմը որ սկսվեց, մենք զորավարժությունների էինք, մեզ ասացին, որ պիտի Թալիշ գնանք՝ հատուկ առաջադրանք կատարելու, որովհետեւ պատերազմ է: Ապրիլի 2-ին գնացինք, ապրիլի 3-ին վիրավորվեցի»,-պատմում է Սասունը:

Զինծառայողի խոսքով՝ դիրքերը հետ բերելու, զինվորներին շրջափակումից ազատելու, վիրավորներին իջեցնելու ժամանակ, թշնամու դիպուկահարի կողմից նկատվել է եւ վիրավորվել թշնամու դիպուկահարի կողմից. «Սնայպերը նկատում ու խփում ձախ  կոնքազդրիս, սակայն տեսնելով, որ զինվորները շրջափակման մեջ են, մոռանալով ցավի մասին՝ առաջ ենք նետվում դեպի գրավված դիրքերը: Այդ ժամանակ թշնամին նկատելով լարված գործողություններ՝ սպեցնազի գործողությունների հետ կապված՝ գործի է դնում ծանր հրետանին, որի ընթացքում տանկի արձակած կրակոցը կպնում է որովայնիս: Էդ ժամանակ արդեն թշնամումու սպեցնազն էլ էր աշխատում ու մեզ օգնական ուժեր եկան, ինձ ու մյուս վիրավորներին դուրս են բերում տարածքից»:

Սասունին նախ տեղափոխում են Մարտակերտի զինվորական հոսպիտալ, ապա Ստեփանակերտի հանրապետական հիվանդանոց: Վիճակը գնահատվում է ծայրահեղ ծանր: Ստեփանակերտում առաջին վիրահատությունն են անում, հաջորդ օրը տեղափոխում Երեւանի Մուրացանի հոսպիտալ՝ ախտորոշումը՝ ձախ կոնքազդրային հոդի շրջանի ականաբեկորային միջանցիկ-թափանցիկ վիրավորում՝ փափուկ հյուսվածքային դեֆեկտով. «Երբ տեղափոխում էին Ստեփանակերտ, գիտակցությունս տեղն էր, բայց արնաքամ լինելու վտանգ կար եւ ինձ առաջին վիրահատությունն արեցին Ստեփանակերտում, հետո Երեւանում:

Մոտ 4 վիրահատություն եմ տարել, 4 ամիս հոսպիտալում գտնվելուց հետո դուրս եմ գրվել՝ հետագա բուժումը տանը շարունակելու համար: Արդեն երկու տարի է անցել, բայց իմ վիճակը գնալով վատանում է, ոչ թե լավանում եմ, ավելի եմ վատանում: Ոտքս երբեմն չի գործում, ձեռնափայտով եմ ման գալիս, մկանային ուժեղ ցավեր եմ ունենում, նյարդային համակարգիս վրա է ազդել»,-պատմեց նա:

Սսաուն Միքայելյանը 2017թ-ին բժշկասոցիալական փորձաքննություն է անցել եւ 3-րդ կարգի հաշմանդամ ճանաչվել: Սասունի պնդմամբ, այդ ընթացքում բազմաթիվ հիվանդանոցներ դիմելուց եւ համապատասխան բուժում չստանալուց հետո ցանկություն է հայտնում բուժվել արտերկրում. «Էլ հիվանդանոց չի մնացել, որ չդիմեմ, բոլորն էլ գրում են, որ ես բազմաթիվ խնդիրներ ունեմ ու էդ խնդիրները օր օրի շատանում են: Թղթերս ուղարկել եմ Գերմանիայի բժշկական հաստատություններից մեկը, որտեղից պատասխան է եկել, որ ինձ կարող են օգնել: Թղթերն ուղարկել եմ ՊՆ, Առողջապահության նախարարություն ու դեռ պատասխան չեմ ստացել»:

Մինչ թղթերը դասավորվում է, Սասունի՝ 2018-ի հերթական փորձաքննության ժամանակն է մոտենում եւ 2018թ-ի բժշկասոցիալական փորձաքննության հանձնաժողովը Սասունին հաշմանդամ չի ճանաչում. «Հիմա ես առանց կարգի չեմ կարող իմ հետագա բուժումը կազմակերպել արտերկրում: Ես հենց փորձաքննությունից հետո էլի դիմում եմ տարբեր հիվանդանոցներ, հետազոտվում եմ ու բոլոր տեղերում եզրակացություն են գրում, որ ինձ մոտ բազմաթիվ խնդիրներ կան՝ նյարդային համակարգի, փափուկ հյուսվածքների, ոտքս շատ ժամանակ առաջ չի գնում, պահ է լինում, որ ես ցավից ուղղակի գալարվում եմ, մի աչքս գրեթե չի տեսնում ու էս վիճակում ինձ կարգից զրկում են: Եթե չի հասնում, ո՞նց են տարբեր հիվանդանոցներ էս խնդիրները մատնանշում: Ինձ ինչու կոնկրետ չեն բացատրում, թե ինչու չի հասնում»,-ընդգծեց Սասուն Միքայելյանը:

Սասունի պահանջը արդարության վերականգնումն է՝ կարգի նշանակումը, որը ննարավորութուն կտա բուժումն իրականացնել արտերկրում:

Նշենք, որ Սասուն Միքայելյանը կնոջ եւ 2 տղաների հետ բնակվում է Հրազդանի Միկրոշրջան թաղամասի վարձակալած բնակարանում, այս պահին որեւէ օգնող ձեռք չունեն: Վերջինս ցանկանում է շուտ ապաքինվել եւ շարունակել ծառայությունը: Սասուն Միքայելյանը պարգեւատրվել է «Հայրենիքի պաշտպան» առաջին աստիճանի մեդալով, ինչպես նաեւ «Մարտական վիրավորում» առաջին աստիճանի կրծքանշանով՝ մարտական գործողությունների ընթացքում վիրավորում ստանալու համար: