Անցողիկ շեմը չի վախեցնում «կանաչներին». նրանք վստահ են, որ կանցնեն խորհրդարան. «Փաստ»

ՀԱՐՑԱԶՐՈՒՅՑ 12 Հուլիս, 2018 8:03

«Փաստ» օրաթերթը գրում է.

Կանաչների կուսակցությունը, որը նախագահ Արմենակ Դովլաթյանի ձևակերպմամբ, ձախ լիբերալ ուղղվածություն ունի, այս փուլում չեն կարող մասնակցել Երևանի քաղաքապետի ընտրություններին, քանի որ ավագանիում ներկայացուցիչ չունեն: Իսկ ներկայացուցիչ չունեն, քանի որ ավագանու նախորդ ընտրությունները կուսակցությունը բոյկոտել է: Հիմա, եթե ավագանին լուծարվի, Կանաչների կուսակցությունն այս ընտրությունը ոչ միայն չի բոյկոտի, այլև անպայման կմասնակցի: «Ե՛վ Երևանի ավագանու ընտրություններին, և՛ Ազգային ժողովի ընտրություններին մենք անպայման մասնակցելու ենք: Մենք ձգտելու ենք միայնակ հանդես գալ, բայց հնարավոր են նաև այնպիսի տարբերակներ, որ այլ կուսակցությունների հետ համատեղ դաշինքով հանդես գանք: Բայց մեր նախնական տրամադրվածությունը ընտրություններին միայնակ հանդես գալն է»,– ասաց Ա. Դովլաթյանը:

Կուսակցության առաջնորդը նշեց, որ իր դիտարկումներով հասարակության շրջանում պահանջարկ կա, որ Կանաչների կուսակցությունը ներկայացված լինի կառավարման համակարգում: Եվ անկախ նրանից, իշխանական, թե ընդդիմադիր դաշտում նրանք հանդես կգան, այնուամենայնիվ, Հայաստանում բնապահպանական խնդիրների մի մեծ փաթեթ կա, որով հարկավոր է բավականին հանգամանալից և հետևողական պայքարել:

«Մեզ համար միայն բնապահպանական խնդիրները չէ, որ կարևոր են, բայց մենք պարտավոր ենք բնապահպանական խնդիրների պահանջատերը լինել և դրանց լուծումը մեր վրա վերցնել»,– ասաց կուսակցության ղեկավարը:

Նախորդ՝ 2012–ի խորհրդարանական ընտրությունների ժամանակ կուսակցությունը թեև ներկայացուցիչ չի ունեցել խորհրդարանում, բայց ներկայացված է եղել ՀԱԿ դաշինքի կազմում: Այսինքն, կուսակցությունը նախորդ խորհրդարանում ներկայացված կուսակցություն է եղել, բայց նախորդ ընտրությունների ժամանակ արդեն նպատակահարմար չեն համարել խորհրդարանական ՀԱԿ խմբակցության անունով ձևավորված նույնանուն կուսակցության հետ դաշինք կազմել: «ՀԱԿ կուսակցությունն ինքը որոշեց, ինքը մասնակցեց և արդյունքում այսօր որևէ ներկայացուցիչ չունի խորհրդարանում: Իսկ մենք որոշեցինք չմիանալ որևէ այլ դաշինքների և բոյկոտել ընտրությունները»,– ասաց Ա. Դովլաթյանը: Խոսելով ներկայում ընթացող գործընթացների մասին՝ նա նշեց, որ իրենց կուսակցությունը չի մասնակցում «Ընտրական օրենսգրքի» փոփոխությունների գործընթացներին, քանի որ, ըստ նրա, այդ պրոցեսը մոնոպոլիզացված է:

«Մենք քննարկումների ընթացքին ուշադիր հետևում ենք և անհրաժեշտության դեպքում նաև առաջարկներ կանենք: Հիմա աշխատում ենք առաջիկա ընտրությունների նախընտրական ծրագրի վրա: Եթե Երևանի ավագանու արտահերթ ընտրություններ տեղի ունենան, ապա ծրագիր կներկայացնենք նաև այդ ընտրությունների համար, քանի որ Երևանը բազմաթիվ բնապահպանական, քաղաքաշինական խնդիրներ ունի և այդ առումներով ծայրահեղ վատ վիճակում է գտնվում: Ուստի համարում ենք, որ այս առումով կարող ենք մեր դրական խոսքն ասել այդ հարցի մասին»,– ասաց Ա. Դովլաթյանը: Կուսակցության առաջնորդը համաձայն չէ, որ հասարակությունն առանձնապես ծանոթ չէ իրենց կուսակցությանը, և ընտրություններին մասնակցելու դեպքում գուցե իրենք սահմանված անցողիկ շեմը հաղթահարելու խնդիր ունենան: Ավելին, կարծում է, որ ընտրություններին առանձին մասնակցելու դեպքում բավականին լայն շրջանակներ հենց իրենց կընտրեն: «Մենք, նվազագույնը, կհաղթահարենք անցողիկ շեմը և միանշանակ ներկայացված կլինենք: Խոսքն առավելագույն ձայներ ստանալու մասին է»,– ասաց կուսակցության առաջնորդը: Թավշյա հեղափոխությունից հետո ձևավորված նոր կառավարության և նրա աշխատանքի մասին Ա. Դովլաթյանը նշեց, որ հիմնականում գոհ է կառավարությունից, բայց կան խնդիրներ, որոնց մասին կարծիք կհայտնի կառավարության գործունեության 100 օրը լրանալուց հետո: «Կան նաև որոշակի սխալներ, հատկապես կադրային քաղաքականության մեջ, բայց արդյունքների մասին մենք կխոսենք որոշ ժամանակ անց»,– խոսքը եզրափակեց Ա. Դովլաթյանը:

Շարունակությունը՝ «Փաստ» օրաթերթի այսօրվա համարում