Սպառազինությունների ձեռքբերման մի մասն ընթացքի մեջ է. Արտակ Դավթյան
ՔԱՂԱՔԱԿԱՆՄեր ռազմավարական գործընկերների հետ մենք մշտապես աշխատում ենք բոլոր տեսակի սպառազինությունների ձեռքբերման ուղղությամբ։ Այս մասին այսօր՝ ՀՀ լրագրողների հետ զրույցում հայտնեց Հայաստանի զինված ուժերի գլխավոր շտաբի պետ, գեներալ-մայոր Արտակ Դավթյանը՝ պատասխանելով hարցին, թե «Սու-30ՍՄ»–ները ե՞րբ են ձեռք բերելու:
«Երբ կունենանք այդ պայմանագրերը, կներկայացնենք հանրությանը։ Սպառազինությունների ձեռքբերման մի մասն ընթացքի մեջ է, մի մասն արդեն ստացել ենք»,–շեշտեց նա։
Լրագրողները գլխավոր շտաբի պետից հետաքրքրվեցին` «Պատիվ ունեմ», «Ես եմ» ծրագրերը շարունակո՞ւմ են գործել, որքան շահառուներ ունեն: Արտակ Դավթյանն ասաց, որ «Պատիվ ունեմ» ծրագրով այս պահին դիմողների թիվը 250–ից ավելին է։
«Հաշվի առնելով, որ իրենք պետք է անցնեն որոշակի ընտրական գործընթաց և հանձնաժողովը պետք է որոշի՝առողջական տեսակետից պիտանելիության հետ կապված խնդիրների հետ եւ այլ հարցեր, ուստի վերջնական թիվը այդ ժամանակ կհայտարարվի»,–նշեց նա։
Արտակ Դավթյանի խոսքով, նույն իրավիճակն է նաեւ «Ես եմ» ծրագրի պարագայում։ «Այնտեղ էլ կան հանձնաժողովի հետ կապված խնդիրներ, կա բացատրական որոշակի աշխատանք։ Չնայած հրաժարվողներ շատ քիչ են, բայց կան նոր դիմողներ։ Վերջնական թիվը կհայտարարենք, երբ վերջնական հանձնաժողովի հետ գործընթացը կավարտվի»։
Արտակ Դավթյանը ասաց, որ «Ես եմ» ծրագրով ևս շատ հետաքրքրվողներ կան, կոնկրետ թիվը հետո կհրապարակվի:



