«Հան­ցա­գոր­ծու­թյան մա­սին իմա­նալն ու չբա­ցա­հայ­տե­լը նույն­պես հան­ցա­գոր­ծու­թյուն է». «Փաստ»

«Փաստ» օրաթերթը գրում է.

«Ժառանգություն» կուսակցության նախագահ Արմեն Մարտիրոսյանը թեև դեռ չի ծանոթացել «Ընտրական օրենսգրքում» առաջարկվող փոփոխություններին, սակայն շարունակում է այն կարծիքին մնալ, որ ընտրակեղծիքների դեմ պայքարելու ամենաարդյունավետ միջոցն իրենց կողմից առաջարկվող «մեկ քաղաքացի, մեկ քվեաթերթիկ, մեկ քվե» շղթան ապահովելը կլինի:

«Մեր առաջարկած տարբերակը կարճաժամկետ հատվածում իրականանալի է: Այդ պատճառով ենք այդ լուծումն առաջարկում: Ինչ վերաբերում է «Ընտրական օրենսգրքի» նոր տարբերակին, ապա թեև նոր տեքստին ամբողջապես ծանոթ չեմ, քանի որ «Ժառանգություն» կուսակցության հետ դեռևս որևէ հանդիպում չի եղել, սակայն կարծում եմ, որ բոլոր հնարավորությունները կան նորմալ ընտրական օրենսգիրք ընդունելու համար: Ոչ միայն ռեյտինգային համակարգը վերացնելն է կարևոր, այլև կրկնաքվեարկություններ, լցոնումներ, ուղղորդված քվեարկություններ կազմակերպելը թույլ չտալը»,- «Փաստ»-ի հետ զրույցում ասաց Ա. Մարտիրոսյանը:

Կուսակցության ղեկավարն, իր խոսքով, մի փոքր համաձայն չէ այն բնորոշմանը, թե քաղաքական դաշտն այս պահին ամայացած է, քանի որ, այնուամենայնիվ, կան քաղաքական միավորներ, որոնք անցած տարիների ընթացքում պայքարել են: Իսկ իրականությունն այն է, որ քաղաքական դաշտ, որպես այդպիսին, ընդհանրապես չկա:

«Եթե Սահմանադրական հանրաքվեի ժամանակ կատարված կեղծիքների հետևանքով քաղաքական դաշտը մեռավ, ապա ԱԺ ընտրությունների ժամանակ այն ուղղակի թաղվեց: Բայց հիմա, բարեբախտաբար, բացվել է այդ դաշտը, և որքան էլ իշխանությունները նախկինում փորձել են վերացնել քաղաքական դաշտը, որոշներն այնուամենայնիվ պայքարի ուժով մնացել են: Ու թեև այս ընթացքում կորցրել են նախկին հզորությունը, սակայն դրանք կան, ինչը հույս է ներշնչում»,- ասաց Ա. Մարտիրոսյանը:

Ինչ վերաբերում է ծրագրային և կազմակերպչական հարցերին, «Ժառանգության» առաջնորդը խնդիր չի տեսնում, քանի որ իրենք հիմա էլ պատրաստ են, բայց որ արտահերթ խորհրդարանական ընտրությունները պետք է մինչև տարեվերջ կազմակերպել, նրա կարծիքով, երկու կարծիք լինել չի կարող: 

Չշրջանցելով օրվա թոփ թեման՝ Մարտիրոսյանը նշեց, որ իրեն նույնպես ամենաշատը ոչ թե Մ. Գրիգորյանին պատկանող շենք-շինություններից հայտնաբերած զինտեխնիկան է հետաքրքրում, այլ այն նամակների բացահայտումը, որոնք ոչ այդքան քրեական, այլ ավելի շատ բարոյական ենթատեքստ ունեն:

«Այն, ինչ տեսանք, որևէ բարոյական սկզբունքի մեջ չի տեղավորվում: Եվ եթե անգամ տարբեր հանցագործություններ հնարավոր է մարդկայնորեն «հասկանալ», ապա երեխաների կողմից ուղարկածը թալանելը որևէ արդարացում ունենալ չի կարող: Ինչ վերաբերում է թալանին, ապա ակնհայտ է, որ նա այդ ամենը միայնակ չէր կարող իրականացնել, և դրա մասին թե՛ նախկինում, թե՛ հիմա հատուկ ծառայություններն իմացել են, քանի որ նրանք նման քայլերի մասին շատ արագ են տեղեկանում: Եվ համոզված եմ, որ այն ժամանակ նույնպես զեկուցել են օրվա իշխանություններին: Այստեղ նաև խնդիր կա բարձրագույն իշխանության տեղեկացված լինելու և նրանց կողմից թողտվության մատնելու կամ հանցագործությունը կոծկելու վերաբերյալ, այդ թվում նաև զենքի առկայության մասով: Այսինքն, հանցագործության մասին իմանալն ու այն չբացահայտելը նույնպես հանցագործություն է, իսկ որ նման երևույթ առկա է, կասկած լինել չի կարող: 

Այնպես որ, խոսքը ոչ միայն նախկին պատգամավորի, այլ շատ ավելի մեծ շրջանակների մասին է, որոնք նույնպես պետք է բացահայտվեն»,- ասաց Ա. Մարտիրոսյանը:

Խոսելով հակահեղափոխականների կողմից ռևանշի գնալու և Մ. Գրիգորյանին որպես «քաղաքական հետապնդման զոհ» ներկայացնելու միջոցով սադրանքի գնալու հնարավորության մասին՝ «Ժառանգություն» կուսակցության ղեկավարն ասաց, որ այն, ինչ հայտնաբերվել է, ոչ թե անձի կամ Հանրապետական կուսակցության հետ է ասոցացվում, այլ՝ մարդկային արժեհամակարգի:

«Անկախ անուններից, նման մարդիկ կան բոլոր կուսակցություններում, տարբեր միավորումներում և բիզնես շրջանակներում: Այդ է պատճառը, որ այդ խնդիրն ամեն դեպքում ինձ համար բաց է մնում: Եվ պարտադիր չէ, որ հակահեղափոխություն անունն անպայման Հանրապետական կուսակցություն անվան հետ կապ ունենա: Ինչ վերաբերում է հակահեղափոխությանը, ապա պետք չէ մոռանալ, որ թե՛ դատական համակարգը, թե՛ լրատվական դաշտը մնացել են նախկին իշխանությունների տիրապետության տակ և չի կարելի բացառել, որ դատական համակարգը սկսի իրեն դրսևորել և իրականությանը չհամապատասխանող որոշումներ նույնպես ընդունի: Կարճ ասած՝ իրավական ճյուղերից 2,5-ը և 4-րդ իշխանության ճնշող մեծամասնության «փաթեթը» դեռևս նախորդ իշխանությունների ձեռքում է, ինչն անկասկած մտորումների տեղիք է տալիս»,- ասաց Ա. Մարտիրոսյանը: