«Պահանջները շինծու են` հոգևոր և բարոյական հիմք չունեն». «Փաստ»

ՀԱՐՑԱԶՐՈՒՅՑ 8 Հունիս, 2018 8:37

«Փաստ» օրաթերթը գրում է.

Ամենայն հայոց կաթողիկոս Գարեգին Բ–ի հրաժարականի պահանջով հունիսի 6–ին «Նոր Հայաստան, նոր հայրապետ» ազգային–եկեղեցական նախաձեռնությունը Երևանի Սուրբ Աննա և Սուրբ Կաթողիկե եկեղեցիների բակում` Կաթողիկոսի երևանյան նստավայրի դիմաց, բողոքի ակցիա էր հրավիրվել։ Կաթողիկոսի հրաժարականից հետո շարժումն ակնկալում է նաև կաթողիկոսական նոր ընտրությունների անցկացում Հայաստանում։ Մայր Աթոռի միաբանական ժողովն արձագանքել էր բողոքի կոչերին և, մասնավորապես, ընդգծել. «Ցավալի է, որ բողոքի հիշյալ գործընթացին խթանում են որոշ անհատներ, ովքեր իրենց անձնական շահերից ելնելով` փորձում են ստվերել ամենքիս համար գնահատելի և կենսական նշանակություն ունեցող այս ավանդը` խաթարելով Սուրբ Եկեղեցու աղոթական կյանքը և գայթակղություն դառնալով բարեմիտ հավատացյալների համար»:

Հնչած կոչերի ու հասցեագրված բողոքի առնչությամբ փորձեցինք մեկնաբանություն ստանալ Տեր Եսայի քահանա Արթենյանից:

«Միանշնաակ չեմ համարում, որ սա պայքարի տարբերակ է: Ոչ թե նրա համար, որ պայքարել ընդհանրապես չի կարելի, այլ աշխարհիկ գործիքներով ու աշխարհիկ մոտեցումներով պայքարելը և մեր նախորդ օրերին տեսած հանրահավաքներն ու ցույցերը կրկնօրինակելը ճիշտ չէ: Սա բողոքը կամ ցանկություններն արտահայտելու ճիշտ ճանապարհ չէ: Եկեղեցին մի մեծ ընտանիք է: Անկախ նրանից, թե հոգևորականներն ովքեր են եղել, անկախ նրանից, թե հայրապետն ով է եղել, դարեր շարունակ եկեղեցում բոլոր տեսակի հարցերը դրական լուծում են ստացել համախմբման, միմյանց նկատմամբ հանդուրժողակա նության և սիրո մթնոլորտում: Սա միակ ճանապարհն է, որովհետև մենք պետք է հաշվի առնենք, որ գործ ունենք եկեղեցու հետ, որը Քրիստոսի մարմինն է: Մեզ համար այս դեպքում առաջնորդողը Քրիստոսի օրինակն է»,– «Փաստ»–ի հետ զրույցում ասաց քահանան:

Տեր Եսայի քահանա Արթենյանը նաև իր խոսքը հղեց բողոքի ակցիաների կազմակերպիչներին ու հասարակությանը:

«Իմ կոչը մեր հավատացյալներին միշտ եղել է հետևյալը. թող մեր հավատացյալներն իրենց համայնքներում համախմբվեն: Եվ եթե ունեն խնդիրներ, հարցեր կամ որևէ երևույթի նկատմամբ դժվարություններ ունեն, պետք է իրենց համայնքներում և իրենց հովիվների, իրենց առաջնորդների հետ պետք է բարձրաձայնեն և լուծումներ գտնեն: Վստահ եմ, որ միակ աշխատող ու գործող ճանապարհը սա է: Իսկ կազմակերպիչներին պետք է հորդորեմ, որ հանդես չգան բոլոր հավատացյալների անունից: Պետք է հորդորեմ հանդես չգալ մանավանդ հոգևորականների անունից և նրանց անունից միանշանակ հայտարարություններ չանեն՝ ասելով, որ «բոլոր հոգևորականները մեզ հետ են, պարզապես վախենում են դուրս գալ ու իրենց բողոքի ձայնը բարձրացնել»,–ասաց նա:

Նշենք, որ բողոքի ակցիայի մասնակիցները հայտարարել են, որ իրենց պահանջները չկատարելու դեպքում շարունակելու են ակցիաները:

Տեր Եսայի քահանա Արթենյանը հույս հայտնեց, որ, ի վերջո, կազմակերպիչները կվերանայեն իրենց դիրքորոշումն ու մոտեցումները. «Մանավանդ` այսպիսի միանշանակ հայտարարություններ անելու ու պաանջներ դնելու առումով: Մանավանդ, որ իրենց բոլոր պահանջների հիմքում արձանագրված և՛ կանոնական, և՛ բարոյական սկզբունքները շինծու են և որևէ իրավական հիմք չունեն: Այդ սկզբունքները թե՛ հոգևոր, թե՛ բարոյական որևէ հիմք չունեն: Հունիսի 6–ի իրենց հանրահավաքի պահանջները և՛ լսեցինք, և՛ ծանոթացանք, բայց որքանո՞վ հաստատուն կմնան իրենց պահանջներին և որքանո՞վ կոշտ կամ խիստ դիրքորոշում կընդունեն, ժամանակը ցույց կտա»,–եզրափակեց մեր զրուցակիցը:

Շարունակությունը՝ «Փաստ» օրաթերթի այսօրվա համարում